گاڤ

دادگەها بلند یا سعوودیێ راگەهاند، سوبەهی رۆژا ئێکێ یا ئێکەم رۆژا مەها زولحیجەیە و دێ رۆژا 26ـێ ڤێ مەهێ رۆژا عەرەفێ بیت.

پێشتر دادگەها بلند یا سعوودیێ داخواز ژ هەمی موسلمانێن وی وەلاتێ کربوو، ئێڤارییا ئێکشەمبییێ کو دکەڤیتە 29ـێ مەها زولقەعدێ، چاڤدێرییا دیتنا هەیڤا زولحیجەیێ بۆ دیارکرنا دەمێ جەژنا قوربانی بکەن.

دادگەها بلند یا سعوودیێ د بەیانەکێ دا راگەهاند، سوبەهی دوشەمبییێ 18ـێ گولانا 2026، رۆژا ئێکێ یل مەها زولحیجەیە و رۆژا سێشەمبییێ 26ـێ گولانا 2026، دێ رۆژا راوەستیانێ بیت ل چیایێ عەرەفێ و رۆژا چارشەمبییێ 27ـێ گولانێ دێ رۆژا ئێکێ یا جەژنا قوربانی بیت.

هەژی گۆتنێ یە، جەژنا قوربانی دکەڤیتە رۆژەکێ پشتی 9ـێ زولحیجەیێ، حەجی د وێ رۆژێ دا ل چیایێ عەرەفێ رادوەستن، کو گرنگترین پایەیا حەجێ یە، جەژن ژی ل 10ـێ زولحیجەیێ دەستپێدکەت و ل 13ـێ زولحیجەیێ ب دویماهی دهێت.

ل سپێدەهییا رۆژا ئێکێ یا جەژنێ، موسلمان دچنە مزگەفتان و نڤێژا جەژنێ دکەن و دەست ب لێدانا تەکبیران دکەن، هەروەسا ئەو چار رۆژە ل وەلاتێن موسلمان دبنە بێهنڤەدانا فەرمی، دانا قوربانی ژی دکەڤیتە پشتی ب دویماهیهاتنا نڤێژا جەژنێ.

موسلمان ل جەژنا قوربانێ میهـ، بزن، گا یان حێشترەکێ دکەنە قوربانی و وی گۆشتێ ب سەر کەسوکار، جیران و هەژاران دابەش دکەن.