گاڤ

پەیڤدارێ حەج و عومرەیا هەرێما کوردستانێ راگەهاند، دویماهی کاروانێ حەجییێن کوردستانێ گەهشتە باژێرێ مەککەها پیرۆز و نوکە هەمی حەجی، کو ژمارا وان 5,120 کەسن، ب سلامەتی گەهشتینە جهێ خۆ.

ئەڤ سالە ناڤێ 5,120 کەسان ب تیروپشکێ بۆ حەجێ دەرکەفتن. ل 07-05-2026، کاروانێ ئێکێ یێ حەجییێن هەرێما کوردستانێ بۆ حەجا ئەڤ سالە ب رێیا فرۆکەخانەیا ناڤدەولەتی یا هەولێرێ بەرەڤ سعوودیێ ب رێکەفت.

دوشەمبییێ 18ێ گولانا 2026ێ، کاروان ستوونی، پەیڤدارێ فەرمی یێ حەج و عومرەیا هەرێما کوردستانێ راگەهاند، دویماهی کاروانێ حەجییان د سەقایەکێ گونجایی دا گەهشتە جهێ خۆجهبوونا خۆ و رۆژانە هەمی خزمەتگۆزاری ژ ئالییێ حکومەتا هەرێما کوردستانێ ڤە بۆ وان دهێنە دابینکرن.

ل گۆرەیی گۆتنا کاروان ستوونی، ل سەر راسپاردەیا مەسروور بارزانی، سەرۆکێ حکومەتا هەرێما کوردستانێ و د. پشتیوان سادق، وەزیرێ ئەوقاف و کاروبارێن ئایینی، ئەڤ سالە هەمی حەجییێن هەرێما کوردستانێ ب فرۆکەیان گەشت کرییە و ئاسانکارییێن تەمام بۆ وان هاتینە کرن.

ئیڤارا دوشەمبییا بهێت، حەجی دێ ب چوونا خۆ بۆ عەرەفێ دەست ب کرنا فەریزەیا حەجێ کەن، رۆژا سێشەمبییێ هەتا دانێ ئیڤاری دێ ل چیایێ عەرەفێ مینن.