گاڤ

لیژنەیا دیسپلینێ یا سەر ب ئێکەتییا تەپایێ یا ئیراقێ ڤە، پشتی ڤەخواندنا رویدانێن یارییا گەڕا 35 یا خۆلا ستێرێن ئیراقێ دناڤبەرا دهۆک و مویسل دا، کۆمەکا سزایێن توند ل سەر یانەیا دهۆک، سەرۆک و چەند کەساتییێن وێ دەرخستن.

ئەینییێ 15-05-2026، ل یاریگەها دهۆک، د چارچۆڤەیێ خولا ستێرێن ئیراقێ دا، یارییا ناڤبەرا یانەیا دهۆک و یانەیا مویسل ب ئەنجامێ (3-3) ب دویماهی هات، لێ یاری د خولەکێن خۆ یێن دویماهییێ دا بەرەڤ ئالۆزییان چوو.

لیژنەیێ د بریارەکا فەرمی دا یانەیا دهۆک ب سزایەکێ دارایی یێ 25 ملیۆن دینارێن ئیراقی سزادا، هەروەسا سەرۆکێ یانەیێ "د. عەبدوللا جەلال" ب هەیاما مەهەکێ و سزایێ دارایی یێ 5 ملیۆن دیناری ژ هەر چالاکییەکا یاریگەهێ راگرت. لیژنەیێ د هەمان دەم دا بریار دا جەماوەرێ یانەیا دهۆک بۆ هەیاما 6 یارییێن ل سەر ئاخا خۆ ژ چوونەناڤا یاریگەهێ بهێتە بێبەهرکرن.

د ڤێ بڕیارێ دا، لیژنەیێ سزایێن جودا-جودا ل سەر ئەندامێن تیما دهۆک ژی سەپاندن، ب تایبەتی خالد موشیر ب راگرتنا 2 یاربیان و 2 ملیۆن دیناران وەک غەرامە و گۆلپارێز زانا جەوزەل ژی ب راگرتنا 2 یارییان و 5 ملیۆن دینار وەک غەرامە. د هەمان دەم دا، سزایێ راگرتنا 2 یارییان و 5 ملیۆن دینار غەرامە ل سەر یاریکەرێ مویسل "jhostin ferney" ژی هاتە سەپاندن.

ل دۆر لایەنێ رابیتەیا یانێ ژی، لیژنەیێ بڕیار دا ئەحمەد سلێڤانەیی و ئۆسامە حسێن ئیسماعیل بۆ هەیاما سالەکێ ژ چوونەناڤا یاریگەهان بهێنە قەدەغەکرن.

لیژنەیێ تەکەز کر کو ئەڤ بریارە ب دەنگێ هەمی ئەندامێن لیژنەیێ هاتینە دەرخستن و مافێ تێهەلچوونێ بۆ لایەنێن سزادایی ڤەکرییە.