گاڤ

نەخۆشخانەیا ئازادی یا فێرکرنێ یا دهۆکێ، پلان و رێنمایێن تایبەت ب رۆژێن بهێنڤەدانا جەژنا قوربانی یا پیرۆز ڤە راگەهاندن و تێدا هاتییە دیارکرن د رۆژێن جەژنێ دا دەوام دێ بیتە نۆبەداری دا کو خزمەتگۆزارییێن ساخلەمییێ ب باشترین شێوە پێشکێشی نەخۆشان بهێنە کرن.

نەخۆشخانەیا ئازادی یا فێرکرنێ ل دهۆکێ، ئێکە ژ مەزنترین و سەرەکیترین نەخۆشخانەیان ل سەر ئاستێ پارێزگەهێ کو رۆژانە پێشوازییێ ل ب سەدان نەخۆش و تەنگاڤییان دکەت. رێڤەبەریا گشتی یا ساخلەمییا دهۆکێ سالانە ل رۆژێن جەژن و بهێنڤەدانێن فەرمی، پلانێن نۆبەدارییێ بۆ نەخۆشخانە و سەنتەرێن هەوارهاتنێ دادرێژیت دا کو چ و کێشە د پێشکێشکرنا خزمەتگۆزارییێن ساخلەمییێ دا بۆ وەلاتییان دروست نەبن.

ل گۆرەیی راگەهاندنا نەخۆشخانەیێ، پشکا هەوارهاتنێ (تەنگاڤییان) دێ 24 دەمژمێران بۆ پێشوازیکرنا هەمی حالەتێن تەنگاڤ یا ڤەکری بیت، ژ وان ژی نەخۆشێن دلی، هەناسەتەنگی، نیشتەرگەرییێن تەنگاڤ، روویدانێن هاتنوچوونێ، کەفتن و شکەستنان.

دیسان کلینیکێن راوێژکاری یێن نۆبەدار دێ ژ دەمژمێر 09:00ێ سپێدێ هەتا 12:00ێ شەڤێ د د خزمەتکرنا وەلاتییان دا بەردەوام بن. نەخۆشخانەیێ ئاشکرا کر ژی، هەر دەما نەخۆشەک پێدڤی ب نڤاندنێ ببیت، هەمی قاتێن نەخۆشخانەیێ ل گەل پشکێن چاڤدێرییا چڕ(ICU)  و ڤەژاندنا دلی دێ د ڤەکری بن.

هەروەسا پشکێن دی یێن گرنگ وەک تاقیگەهـ، تیشک، سۆنەر و دەرمانخانە د رۆژێن جەژنێ دا دێ د ڤەکری بن بۆ پێشکێشکرنا خزمەتگۆزاریاین بۆ نەخۆشێن دکەڤنە د حالەتێن تەنگاڤییێ دا.

بۆ سەرپەرشتیکرنا ڤان کاران و دویڤچوونا رەوشێ، لیژنەیەکا تایبەت ب رێڤەبەرێ کارگێری هاتییە پێکئینان؛ بۆ پێدڤیبوونا بلەز، وەلاتی دشێن پەیوەندیێی ب ژمارەیا تەلەفۆنێ بکەن (07504834792) .

ل گەل وێ چەندێ ژی دا، خشتەیێن نۆبەدارییێ بۆ هەمی هۆبە و پشکان هاتینە بەرهەڤکرن و لیژنێن پێشکێشکرنا خزمەتگۆزارییان وەک (خوارن، پاقژی و سەغبێریکرنێ) د رۆژێن بهێنڤەدانێ دا دێ د بەرهەڤ بن. هەروەسا فەرمانبەرێن نۆبەدار یێن پشکێن کارگێری دێ هەروەک دەواما ئاسایی ل سەر کارێن خۆ بەرهەڤ بن.