گاڤ

دەستەیا سەقاناسییا ئیراقێ هوشدارییەکا ب لەز دەربارەی پێلەکا گەرمییێ یا توند بەلاڤ کر کو هەمی ئیراقێ ب هەرێما کوردستانێ ژی ڤە ڤەدگریت.

ل گۆرەی پێشبینییێن دەستەیا سەقاناسییا ئیراقێ، ژ سوبەهی پێنجشەمبی ڤە پلەیێن گەرمییێ ل پترییا پارێزگەهێن ئیراقێ دێ ب رەنگەکێ بەرچاڤ بلند بن. ئەڤ پێلا گەرمییێ ل دویماهییا حەفتیێ دێ گەهیتە بلندترین ئاستێ خۆ، و مەترسی ب تنێ د بلندبوونا پلەیێن گەرمییێ دا نینە؛ بەلکو رۆژا ئەینی، پێلەکا ب هێز یا تۆزێ دێ دەڤەرێ ڤەگریت. ئەڤ تۆزە دێ بیتە ئەگەرێ کێمبوونا ئاستێ بینینێ ل سەر رێیان و دروستبوونا مەترسییێ بۆ سەر ئەو کەسێن نەخۆشییێن کۆئەندامێ هەناسێ و ب تایبەت رەبۆ (Asthma) هەین.

ژبەر ڤێ یەکێ، رێنمایی و رێکارێن خۆپارێزییێ هاتینە راگەهاندن و تێدا هاتییە کو پێدڤییە شۆفێر ب هشیاری ترەمبێلێ بهاژۆن و لەزاتییا خۆ کێم بکەن. هەروەسا ئەو کەسێن تووشی نەخۆشییا رەبۆیێ بووین، پێدڤییە ل مالێن خۆ بمینن و ماسکان بکار بئینن دا کو سلامەت بن. ل پارێزگەهێن هەرێمێ، پێشبینی دهێتەکرن پلەیێن گەرمییێ بۆ دویماهییا ڤێ حەفتیێ ل ناڤەندا باژێران بگەهنە بلندتر ژ 40 پلەیێن سیلیزی. دێ ل هەولێر و کەرکووکێ پلەیێن گەرمییێ د ناڤبەرا 40 بۆ 44 پلەیان دا بن، و دێ ل سلێمانی، دهۆک و هەلەبجە ژی د ناڤبەرا 38 بۆ 41 پلەیان دا بن، ل دەڤەرێن چیایی ژی دێ کێمەکێ فێنکتر بیت.

مەها گولانا 2026ێ وەک ئێک ژ گەرمترین مەهێن گولانێ د دیرۆکا نوی یا دەڤەرێ دا دهێتە هەژمارتن، کو پلەیێن گەرمییێ ل هندەک وەلاتێن جیران وەک هندستان و پاکستان ژی گەهشتینە نێزیکی 50 پلەیان. زێدەبوونا پێلێن تۆزێ ل ئیراقێ د سالێن دویماهیێ دا پەیوەندی ب گوهۆڕینێن سەقای، بیابانبوون و کێمییا ئاڤێ ڤە هەیە، کو ئەڤ چەندە بوویە ئەگەرێ هندێ سالانە ب سەدان مرۆڤ ژبەر ئاریشەیێن هەناسێ رەوانەی نەخۆشخانەیان بهێنەکرن. پسپۆرێن ژینگەهێ هوشدارییێ ددەن کو ئەڤ جۆرە پێلێن گەرمییێ د پاشەرۆژێ دا دێ پتر بن و پێدڤییە رێکارێن درێژخایەن بۆ رویبەڕویبوونا وان بهێنەگرتن.