گاڤ

نێچیرڤان بارزانی، سەرۆکێ هەرێما کوردستانێ، پێشوازی ل پاتریک دۆرێل، بالیۆزێ فڕەنسا ل ئیراقێ کر و هەردو ئالییان رەوشا دەڤەرێ گۆتوبێژ کر.

ل گۆرەیی سەرۆکاتییا هەرێما کوردستانێ، ئەڤرۆ دوشەمبییێ 1ێ خزیرانا 2026ێ، د دیدارەکێ دا پەیوەندییێن فڕەنسا ل گەل ئیراق و هەرێما کوردستانێ، رەوشا سیاسی یا ئیراقێ و پێکئینانا حکومەتا فیدرالی هاتنە گۆتوبێژ کرن و تەکەزی ل سەر گرنگییا بەردەوامییا هەڤکاری و هەماهەنگییا هێزێن سیاسی "ژ پێخەمەت پاراستنا سەقامگیری، ئارامی و سەروەرییا وەلاتی دا" کر.

سەرۆکاتییا هەرێما کوردستانێ دبێژیت: "هەردو ئالییان ل دۆر رەوشا سیاسی ل هەرێما کوردستانێ و بزاڤان بۆ دەربازکرن و چارەکرنا کێشەیێن ناڤخۆیی هزر و دیتنێن خۆ گوهۆڕین، هەروەسا دیالۆگ و لێکتێگەهشتنا هەولێر ـ بەغدا بۆ چارەکرنا کێشەیێن هەلاویستی ب پێدڤی زانی".

راگەهاندن ئاماژەیێ ب وێ چەندێ ژی ددەت، "دویماهی پێشهاتێن هەرێمی و رەوشا دەڤەرێ، تەوەرەکێ دی یێ دیدارێ بوو. هەردو ئالی هەڤڕا بوون ل سەر گرنگییا چارەکرنا ئاشتییانە یا کێشە و ناکۆکییان و پاراستنا ئارامی و سەقامگیرییێ".

د دیدارێ دا، یان برێم، کۆنسولێ گشتی یێ فڕەنسا ل هەرێما کوردستانێ یێ بەرهەڤ بوو.