گاڤ

گرۆپێ ئەسحاب ئەلکەهف راگەهاند، ئەگەر بەیرووت یان باشۆرێ لبنانێ ببیتە ئارمانجا هێرشێن ئسرائیلێ ئەو دێ باژێڕێ ئیلات کەنە ئارمانج.

ئسرائیلێ د چەند دەمژمێرەکێن بۆرى دا ب دژوارى هێرشى بەیرووت و باشۆرێ لبنانێ کریە، ل دەمەکى هەر دو ئالی ل سەر کێمکرنا شەڕى و راگەهاندنا ئاگربەستەکێ نێزیکى ئێک ببوون.

گرۆپێ ئەسحاب ئەلکەهف کو ئێکە ژ گرۆپێن چەکدار یێن ئیراقێ ئەڤرۆ سێشەمبێ بەیانەک ل دۆر هێرشێن ئسرائیلێ ل سەر لبنانێ بەلاڤکر و راگەهاند، ناوچەیا ئیلات و دەرتەنگا وێ دێ ببنە ئارمانجا وان ئەگەر بەیرووت و باشۆرێ لبنانێ ببنە ئارمانج و داخوازییا رادەستکرنا چەکى ژى رەتکر.

هەر د بەیانا خۆ دا گرۆپێ ئەسحاب ئەلکەهف دیارکریە، ئەگەر دهێتە گۆتن مەرجەعیەتا بلند یا ئاینى پشتەڤانییا وێ رێبازێ دەت، گۆتنەکا باتلە.

هەروەسا ئاماژە ب بەیاننامەیا حەسەن نەسروولا، ئەمیندارێ گشتى یێ پێشتر یێ حزبوللا کر و هەلوەستێ مەرجەعیەتێ ژى وەک سەرخستنا گەلێ فلستینێ ب ناڤکر.

ئیلات باژێڕەکێ گەشتیارى یە د کەڤیتە باشۆرێ ئسرائیلێ ل سەر بەراڤێن کەنداڤێ عەقەبە و ب ئێک ژ باژێڕێن گەشتیارى یێن ناڤدار یێن ئسرائیلى دهێتە هەژمارتن.