گاڤ - تایبەت

رێڤەبەرییا کۆچ و کۆچبەران بۆ گاڤ راگەهاند، 500 خێزانێن ئاوارەیێن شنگالێ دێ ڤەگەڕنە سەر وارێن خۆ.

پیر دەیان جەعفەر، رێڤەبەرێ کۆچ و کۆچبەران ل پارێزگەها دهۆکێ بۆ گاڤ گۆت: 500 خێزانێن ئێزدى یێن ئاوارە ل کەمپێن دهۆکێ دێ ڤەگەڕنە سەر مالێن خۆ و ئاشکراکر، کۆچ و کۆچبەرێن دهۆکێ ب هەڤکارى ل گەل رێکخستنا کۆچا نێڤدەولەتى (ئاى ئۆ ئێم) و دەزگەهێ خێرخوازیێ بارزانى رێکارێن ڤەگەڕاندنێ بجهـ دئینیت.

دەیان ئاشکراکر، پێشتر وان ئاوارەیان خۆ تۆمار کریە و هەر جار 30 تا 40 خێزانان بەر ب جهێن خۆ ددەنە رێ.

ل گۆڕەیى زانیارییێن گاڤ هەر خێزانەک دێ ملیۆنەک و 500 هزار دیناران وەرگریت وەک خەرجیێن ڤەگوهاستنێ.