گاڤ

نێچیرڤان بارزانی سەرۆکێ هەرێما کوردستانێ پیرۆزباهییێ ل تۆم باراک دکەت، ب هەلکەفتا دەستنیشانکرنا وی وەک هنارتییێ تایبەت یێ ئەمریکا بۆ ئیراقێ.

ئێکشەمبییێ 31-05-2026 د پۆستەکێ دا ل ترووس سۆشیلڵ، دۆنالد ترەمپ راگەهاند، دەستنیشانکرنا تۆم باراک وەک هنارتییێ تایبەت بۆ ئیراقێ و سووریێ د دەمەکی دا یە کو "هەڤکارییێن مە یێن ستراتیژی ل گەل حکومەتێن سووریێ و ئیراقێ پێش دکەڤن و پەیوەندییێن مە ل گەل وان دا بەردەوام د گەشەکرنێ دانە."

سەرۆک نێچیرڤان بارزانی، د پەیامەکا پیرۆزباهییێ دا دبێژیت: "ئەم چاڤەرێی رۆل و سەرکرداتییا وی دکەین د بهێزکرنا پەیوەندییێن د ناڤبەرا ئیراق، کوردستان و ئەمریکا دا و هاریکاریکرن بۆ چارەکرنا وان ئاستەنگێن تووشی وەلاتی دبن."

سەرۆکێ هەرێما کوردستانێ زێدەتر دبێژیت: "ئەم هیڤییا سەرکەفتنێ بۆ وی د ڤی ئەرکێ گرنگ دا دخوازین و د پشتراستین کو بزاڤێن وی دێ بنە ئەگەرێ ئارامی و هەڤکارییەکا زێدەتر."

سەرۆکێ ئەمریکا نڤیسییە: "مە سوپاسییێن مەزن بۆ وی کاری هەنە یێ تۆم باراکی کری، ل گەل ئامادەباشیا وی یا بەردەوام بۆ خزمەتکرنا وەلاتێ مە."

ل گۆرەیی راگەهاندنا ترەمپی، تۆم باراک دێ د پۆستێ بالیۆزێ ئەمریکا ل تورکیا دا مینیت و د هەمان دەم دا ئەرکێ هنارتییێ تایبەت یێ سەرۆکاتییێ بۆ ئیراقێ و سووریێ ژی دێ برێڤەبەت. ترەمپی ئاماژە ب وێ چەندێ ژی کر کو باراک "ب پشتەڤانییا تەمام یا وەزارەتا دەرڤە یا ویلایەتێن ئێکگرتی یێن ئەمریکا" دێ کارێن خۆ کەت.