گاڤ

رێڤەبەرێ گشتی یێ بازرگانییا هەرێما کوردستانێ دبێژیت: ل بەغدا هاتیە راگەهاندن کو حەفتییا بهێت دێ چێکرنا فۆرمێ بۆ خێزانێن نوی و چەندین خزمەتگۆزارییێن دی بۆ فۆرما ئەلکترۆنی یا خوارنێ هێنە زێدەکرن.

بۆ جارا ئێکێ ل 2ی خزیرانا 2025ێ پرکرنا فۆرما ئەلکترۆنی یا خوارنێ دەستپێکر، لێ هەتا ئەڤرۆ ڤەگوهاستنا خێزانان و چێکرنا فۆرمان بۆ خێزانێن نوی د سیستەمی دا کارا نەبوویە.

سێشەمبییێ 2ێ خزیرانا 2026ێ، نەوزاد شێخ کامل، رێڤەبەرێ گشتی یێ بازرگانییا هەرێما کوردستانێ راگەهاند، رێڤەبەرێ گشتی یێ پلان و دویڤچوونێ ل بازرگانییا عیراقێ راگەهاندیە کو ل حەفتییا بهێت دێ چێکرنا فۆرمێن نوی بۆ خێزانێن نوی دەستپێکەت.

نوکە زێدەکرنا ناڤێ زارۆکان بۆ فۆڕما خوارنێ ل هەرێما کوردستانێ دەستپێکرییە و تنێ پارێزگەها هەولێرێ مایە. رێڤەبەرێ گشتی یێ بازرگانییا هەرێما کوردستانێ گۆت: "بەرپرسێن بەغدا دبێژن ل ڤێ حەفتییێ ل هەولێرێ ژی دێ دەست ب زێدەکرنا زارۆکان هێتە کرن."

دەربارەیی ڤەگوهاستنا فۆرما ئەلکترۆنی یا خێزانان ژ باژێرەکی بۆ باژێرەکێ دی، ل گۆرەیی پلانێن وەزارەتا بازرگانی یا ئیراقێ بیت، "د ڤێ مەهێ دا دێ چیتە د بیاڤێ بجهئینانێ دا."

بەری گوهۆرینا فۆرما خوارنێ بۆ یا ئەلکترۆنی، 5 ملیۆن و 386 هزار و 51 وەلاتییان ل هەرێما کوردستانێ پشکاخوارنا خۆ یا مەهانە وەردگرت، لێ ل گۆرەیی دویماهی ئامارێن وەزارەتا بازرگانی، 294 هزار و 432 وەلاتییان ژبەر تۆمارنەکرنا وان د سیستەمێ ئەلکترۆنی دا پشکاخوارنا وان هاتیە بڕین."