گاڤ

دادگەها تاوانێن بەهنگاربوونا گەندەلییێ ل بەغدا ئەنجامێن دەستپێکی یێن ڤەکۆلینێ د دۆسیەیا عەدنان محەممەد مەحموود بریکارێ پێشتر یێ وەزیرێ پەترۆلێ دا بەلاڤکرن و راگەهاند، دەست ب سەر کۆژمەکێ مەزن یێ پارەیێ کاش، زێر، چەک و ب دەهان مولکان دا هاتیە گرتن.

عەدنان محەممەد مەحموود ل سەردەمێ محەممەد شیاع سوودانی دا، بریکارێ وەزیرێ پەترۆلێ یێ ئیراقێ بوو بۆ کاروبارێن پالاوتنێ و رێڤەبەرێ گشتی یێ کۆمپانیا پالاوتنا باکور و پالاوتگەها بێجی بوو.

ل گۆرەیی راگەهاندنا جڤاتا بلند یا دادوەری یا ئیراقێ، ئەڤرۆ سێشەمبییێ 2ێ خزیرانا 2026ێ، دادوەرێ ڤەکۆلینێ ل دادگەها تاوانێن بەرهنگاربوونا گەندەلییێ ئاماژە ب وێ چەندێ کر، ڤەکۆلینێن ل گەل تۆمەتبارێ دەستەسەرکری عەدنان محەممەد مەحموود و گرۆپێ وی، ئەنجامێن مەزن هەبووینە و دەست ب سەر چەندین مولک و مالێن وان و وان کەسان دا ژی هاتیە گرتن کو پەیوەندی ب دۆسیەیێ ڤە هەبوویە.

دادوەرێ تایبەتمەند ب دۆسیەیێ ڤە دبێژیت: "هەتا نوکە دەست ب سەر نێزیکی 40 مولکان دا هاتیە گرتن کو دکەڤنە پارێزگەهێن بەغدا، سەلاحەدین و هەولێرێ."

دەربارەیی کۆژمێ وی پارە و زێڕێ د ڤێ دۆسیەیێ دا دەست ب سەر دا هاتیە گرتن، دادوەری گۆت: "شیاینە دەست ب سەر کۆژمێ 10 ملیۆن دۆلارێن ئەمریکی و 3 ملیار دینارێن ئیراقی دا، ل گەڵ کیلۆ و نیڤەکا زێڕی دا بگرن."

هەر ل گۆرەیی راگەهاندنا دادگەهێ، د مالێن تۆمەتباری و گرۆپێ وی دا کۆژمەکێ مەزن یێ چەکێن سڤک و ناڤنجی هاتینە دیتن و دەست ب سەر دا هاتیە گرتن.

دادوەرێ ڤەکۆلینێ تەکەزێ ل وێ چەندێ ژی دکەت کو ئەڤە نە دویماهییا دۆسیەیێ یە و راگەهاند: "ڤەکۆلین هێشتا بەردەوامن بۆ ئاشکراکرنا هەمی وان کەس و ئالییێن پەیوەندی ب ڤێ تاوانێ ڤە هەیی."

عەدنان محەممەد ئێکە ژ وان بەرپرسێن بلند کو د چوارچۆڤەیێ هەوێن بەرهنگاربوونا گەندەلییێ دا ل ئیراقێ ڤەکۆلین ل گەل دهێتە کرن. رۆژا شەمبییێ 30ێ گولانا 2026ێ، ل دەڤەرا ئیسحاقی ل پارێزگەها سەلاحەدین هاتە دەستەسەرکرن.