گاڤ

وەزارەتا دارایی یا ئیراقێ راگەهاند، گاڤێن ڤەگوهاستنا پرۆژەیێ 'هەژماری من' بۆ سەر وەزارەتا دارایی، نوکە ب چەندین قویناغەکا دەستپێکرینە و بریارە د چەند مەهێن بهێت دا دێ ب تەمامی پرۆژە رادەستی وەزارەتێ هێتە کرن.

مەسروور بارزانی، سەرۆکێ حکومەتا هەرێما کوردستانێ، ل مەها شوباتا سالا 2023ێ، پرۆژەیێ 'هەژماری من' راگەهاند. ل گۆرەیی حکومەتێ ئەڤ پرۆژە پشکەکە ژ 'دیدگەهـ و ستراتیژیەتا حکومەتێ' بۆ بەرفرەهکرنا گشتگیرییا دارایی و کێمکرنا پشتبەستنا ب پارەیێ کاش.

سێشەمبییێ 2ێ خزیرانا 2026ێ، ئاوات شێخ جەناب، وەزیرێ دارایی و ئابۆری یێ حکومەتا هەرێما کوردستانێ ل گەل تیمێ سەرپەرشتییا پرۆژەیێ 'هەژماری من' ل نڤیسینگەها سەرۆکوەزیرێن حکومەتا هەرێما کوردستانێ کۆمبوو.

ل گۆرەیی راگەهاندنا وەزارەتێ، د کۆمبوونێ دا گۆتوبێژ ل سەر دویماهی گاڤێن بجهئینانا پرۆژەیێ 'هەژماری من' هاتە کرن و تەکەزی ل بلەزکرنا پرۆسەیا تۆمارکرنا هەمی مووچەخۆران د نێزیکترین دەم دا هاتە کرن.

د پشکەکا دی یا کۆمبوونێ دا، وەک د راگەهاندنێ دا هاتی، بەحس ل گاڤێن ڤەگوهاستنا پرۆژەیی بۆ سەر وەزارەتا دارایی هاتە کرن، کو نوکە ب چەندین قویاغەکان دەستپێکریە و بریارە د چەند مەهێن بهێت دا ب تەمامی پرۆژە دێ رادەستی وەزارەتێ هێتە کرن.

هەڤدەم د تەوەرەکێ دی یێ کۆمبوونێ دا، داتا و زانیارییێن دویماهی گاڤێن پرۆژەیێ 'هەژماری من' هاتنە ئاشکراکرن، هەتا نوکە ملیۆنەک و 168 هزار فەرمانبەر و مووچەخۆر هاتینە تۆمارکرن و پتر ژ 830 هزار کارتێن بەنکی هاتینە دابەشکرن، بۆ مووچەیێ مەها گولانێ ژی 800 هزار کەسان ب رێیا 635 ئامێرەیێن راکێشانا پارەیی (ATM) مووچەیێ خۆ وەرگرتییە.

وەزارەتا دارایی بەحس ل وێ چەندێ کر، نوکە پرۆسەیا تۆمارکرنا فەرمانبەرێن گرێبەست ل سەر داهات، گەشەپێدان و میلاکاتان دەستپێکریە و نێزیکی 50 هزار مووچەخۆران ماینە کو خۆ تۆمار بکەن، پشکەکا مەزن ژ وان میراتگرێن خانەنشینانە و پشکەک ژی ئاکنجییێن دەرڤەیی کوردستانێ نە.

هەڤدەم ئاماژە ب وێ چەندێ ژی هاتە کرن، ژ سەرجەمێ 474 هزار کەسوکارێن شەهیدان و مفادارێن چاڤدێرییا جڤاکی، هەتا نوکە 418 هزار ژ وان هاتینە تۆمارکرن و 220 هزار مووچەخۆران ژی کارتێن خۆ یێن بەنکی وەرگرتینە.

د دویماهییا راگەهاندنا وەزارەتا دارایی دا ئەڤ چەندە ژی هاتیە دیارکرن، وەزیرێ دارایی تیم و ئالییێن پەیوەندیدار راسپاردن کو هەمی بزاڤ و شیانێن خۆ ل گەل بەنکان بکاربئینن بۆ چارەکرنا وان کێشەیێن د هەیاما دەربازبوویی دا دروستبووین، ب تایبەتی کێشەیا ئامێرەیێن راکێشانا پارەیی و ئەو کێشەیێن گرێدایی ب خانەنشینان ڤە د دەما وەرگرتنا کارتێن وان یێن بەنکی دا، ل گەل دانانا میکانیزمەکا نوی بۆ تۆمارکرنا وان خانەنشینێن نەخۆش و پەککەفتی یێن کو نەشێن سەرەدانا بەنکان بکەن.