گاڤ

دۆنالد ترەمپ دبێژیت، گفتوگۆیێن واشنتۆن و تەهرانێ د بەردەوامن و ئەو راپۆرتێن نووچەیی یێن کو دبێژن پەیوەندی هاتینە بڕین، نەدروست و د شاشن. ترەمپ هوشدارییێ ددەتە تەهرانێ کو دەم هاتیە رێککەفتنەکێ بکەت، چونکی ئێدی ڕێ ب وێ رەوشێ ناهێتە دان کو 47 سالن یا بەردەوامە.

ئەڤ لێدوانێن ترەمپی د دەمەکی نە، ئالۆزی ل رۆژهەڵاتا ناڤین ژبەر شەڕێ ئیرانێ و پرسیارا دائێخستنا دەرتەنگا هورمز د بەردەوامن و بزاڤێن دیپلۆماسی ژی بۆ رێگریکرنێ ل زێدەتر گەشەکرنا وی شەڕی د بەردەوامن.

سێشەمبییێ 2ێ خزیرانا 2026ێ، دۆنالد ترەمپ د پۆستەکی دا ل ترووس سۆشیال، ئەو راپۆرتە رەتکرن کو بەحس ل بڕینا گفتوگۆیێن دناڤبەرا ئەمریکا و ئێرانێ دا دکەن و ب نووچەیێن سەختە ب ناڤکرن. ترەمپی نڤیسییە: "راپۆرتێن نووچەیی یێن سەختە کو دبێژن کۆمارا ئیسلامی یا ئێرانێ و ویلایەتێن ئێکگرتی یێن ئەمریکا بەریا چەند ڕۆژەکا ئاخفتنا ل گەل ئێکدو راگرتیە، نەدروست و د شاشن."

سەرۆکێ ئەمریکا بەحس ل چڕی و بەردەوامییا گفتوگۆیان کر و دبێژیت: "گفتوگۆیێن دناڤبەرا مە دا ب بەردەوامی هاتینە کرن، ژ وان ژی چار رۆژان بەری نوکە، سێ رۆژان بەری نوکە، دو رۆژان بەری نوکە، دوهی و ئەڤرۆ ژی."

دەربارەیی چارەنڤیسێ ڤان گفتوگۆیان، ترەمپی ب نەرۆهنی ئاخفت، لێ هوشدارییەکا توند ئاراستەیی تەهرانێ کر و نڤیسییە: "دێ بەر ب کیڤە چن، کەس نوزانیت، بەلێ وەک من بۆ ئیرانێ گۆتی، 'دەم هاتیە ب رێیەک ژ رێیان، رێککەفتنەکێ بکەن. 47 سالن هوین ڤی کاری دکەن و ئێدی ڕێ ناهێتە دان یا بەردەوام بیت."