گاڤ

سەرۆکوەزیرێن ئیراقێ، ل گەل شاندەکێ بلند یێ هەرێما کوردستانێ و نوینەرێن کۆمپانییێن پەترۆلێ کۆمبوو و بریار دا ژ سوبەهی پێنجشەمبی وێڤە کۆمپانیادەست ب کارێن خۆ بکەنەڤە و هەمی پێدڤییێن ئەمنی بۆ وان بهێنە دابینکرن.

ژ دەستپێکا شەڕێ ئەمریکا و ئسرائیلێ ل گەل ئیرانێ ل 28ی شوباتێ وەرە، هێرش ل سەر هەرێما کوردستانێ ب 856 مۆشەک و درۆنان هاتە کرن کو پشکەک ژ وان بۆ سەر کۆمپانی و زەڤییێن پەترۆلێ بوون. ژبەر وان هێرشان، پشکەکا مەزن یا کۆمپانییێن بیانی یێن پەترۆلێ ل هەرێما کوردستانێ کارێن خۆ راگرتن.

چارشەمبییێ 3ی خزیرانا 2026، نڤیسینگەها راگەهاندنا سەرۆکوەزیرێن ئیراقێ راگەهاند، عەلی فالح زەیدی پێشوازی ل شاندەکێ حکومەتا هەرێما کوردستانێ ب سەرۆکاتییا کەمال محەمەد، وەزیرێ سامانێن سروشتی ب وەکالەت و نوینەرێن وان کۆمپانیایێن پەترۆلێ کر یێن کو ل هەرێما کوردستانێ کار دکەن. د کۆمبوونێ دا وەزیرێن دەرڤە و پەترۆلێ، هەروەسا سەرۆکئەرکانێ سوپایێ ئیراقێ د بەرهەڤ بوون.

ل گۆرەیی راگەهاندنێ، نوینەرێن کۆمپانییان بەحس ل رەوشا کارکرنا خۆ کریە، "ب تایبەتی ل ژێر کاریگەرییا وان شەڕ و ئالۆزییێن ل دەڤەرێ رویداین، دیسان دیتنا خۆ بۆ دەستپێکرنا بلەز یا پرۆسەیا بەرهەمئینانێ دیار کریە."

د راگەهاندنێ دا هاتیە، عەلی زەیدی د کۆمبوونێ دا تەکەزی ل گرنگییا دەستپێکرنا هنارتنا پەترۆلێ کریە و راگەهاندیە، "ئەو زیانا ژبەر راوەستاندنا هنارتنا پەترۆلێ ب رێیا دەرتەنگا هورمز گەهشتیە ئیراقێ یا مەزنە، ئەڤ چەندە ژی پێدڤی دکەت کو بزاڤ بهێنە چڕکرن بۆ قەرەبۆکرنا وان زیانان ب رێیا چارەکرنا کێشەیێن ل هەمبەر زێدەکرنا بەرهەمئینانێ."

سەرۆکوەزیرێن ئیراقێ فەرمان ل ئالییێن پەیوەندیدار کریە، هەمی پێدڤییان بۆ پاراستنا ئاسایشا کۆمپانییێن پەترۆلێ ل هەرێما کوردستانێ دابین بکەن و ژینگەهەکا گونجایی بۆ وان بەرهەڤ بکەن.

نڤیسینگەهـ دبێژیت: سەرۆکوەزیرێن ئیراقێ رەزامەندی دا کو "ژ سوبەهی پێنجشەمبی وێڤە کۆمپانییێن پەترۆلێ ل هەرێما کوردستانێ دەست ب کارێن خۆ بکەن."