گاڤ

حکومەتا هەرێما کوردستانێ گاڤێن خۆ بۆ بەلاڤکرنا پارچەزەڤییان ل سەر فەرمانبەرێن گرێبەست بلەزتر لێ دکەت. وەزارەتا دارایی داخوازا داتایێن هویر و سالێن خزمەتا وان دکەت و وەزارەتا باژێرڤانییێ ژی بەر هەڤییان دکەت بۆ بەلاڤکرنا "فۆرمەکێ" ل سەر وان فەرمانبەرێن مەرج ل سەر دهێنە بجهئینان.

بەلاڤکرنا پارچەزەڤییان ل سەر فەرمانبەران ل گۆرەیی بریارا جڤاتا وەزیرانە کو ل 27-03-2024ێ دەرکەفتیە و پاشی فەرمانبەرێن گرێبەست ژی ڤەگرتن.

وەزارەتا دارایی و ئابۆری یا هەرێما کوردستانێ د نڤیسارەکا نوی دا ب (ژمارە 280) کو ئاراستەیی هەمی وەزارەتان هاتیە کرن، داخواز کریە داتایێن هویر یێن فەرمانبەرێن گرێبەست (ئاسایی، داهاتێ ناڤخۆ، پێشینە و بەرهەمئینان) بهێنە هنارتن.

وەزارەتێ راگەهاندیە کو پێدڤییە "هەیاما خزمەتێ" ب هویربینی بهێتە دیارکرن دا کو مافێ چو فەرمانبەران بەرزە نەبیت.

سەربەست مەولوود، رێڤەبەرێ یاسایی ل وەزارەتا باژێرڤانییێ یا هەرێما کوردستانێ، دەربارەیی رێکاران راگەهاند: "نوکە وەزارەت مژویلی فرێکرنا ناڤانە بۆ وەزارەتا دارایی. پشتی کو ناڤ دگەهنە جڤاتا وەزیران و بۆ مە دهێنە رەوانەکرن، دێ فۆرمەکێ راگەهینین دا کو فەرمانبەر پڕ بکەن."

دەربارەیی مەرجێن مفاداربوونێ، رێڤەبەرێ یاسایی یێ وەزارەتا باژێرڤانییێ گۆت: "پێدڤییە فەرمانبەرێ گرێبەست پێشتر مفادار نەبیت و پتر ژ 8 سالێن خزمەتێ هەبن؛ ئانکو هەمان مەرجێن فەرمانبەرێن هەردەمی و پێشمەرگەیی دێ ل سەر وان ژی هێنە بجهئینان."

نەبەز ئیسماعیل، پەیڤدارێ وەزارەتا ئەوقافێ گۆت: لیستا ناڤێن 709 فەرمانبەرێن گرێبەست فرێکریە و نوکە مژویلی هویربینینێ نە د "هەیاما خزمەتا" وان دا.

دیسان نامق هەورامی، پەیڤدارێ وەزارەتێ ئاشکرا کر، لیستا 518 فەرمانبەرێن ل سەر بودجەیی و نێزیکی 50 فەرمانبەرێن سەر داهاتێ ناڤخۆ رەوانە کرینە.

چارشەمبییێ 3ێ خزیرانا 2026، د. توانا نەجەف، رێڤەبەرێ گشتی یێ فەرمانگەها کارگێری و دارایی بۆ گاڤ راگەهاند، ئەڤرۆ کارێن وان دێ ب دویماهی هێن و دێ لیستا خزمەتا فەرمانبەرێن گرێبەست بۆ داراییێ هنێرن.

دیسان هیوا نەسرەدین، جێگرێ سەرۆکێ دیوانێ بەرهەڤی نیشان دا کو لیستا ناڤێن کێمتر ژ 20 فەرمانبەرێن گرێبەست رەوانە کریە و کارێن وان ب دویماهی هاتینە.

زانیاری دەربارەیی پارچەزەڤییان:

● رووبەرێ ئەردی: 200 مەترێن چارگۆشە (دوجا).

● شێوازێ بەلاڤکرنێ: تیروپشک (پشککێشان).

● پیڤەر: سیستەمێ خاببەندی.

● مەرجێ سەرەکی: هەرچنەبیت هەشت سالێن خزمەتێ هەبن و پێشتر مفادار نەبیت.