گاڤ

کۆمپانیا کۆرەک تیلیکۆم د راگەهاندنەکێ دا رەخنەیێ ل دەستەیا راگەهاندن و گەهاندنا ئیراقێ دگریت و ب وێ چەندێ تۆمەتبار دکەت کو یا "بێئالی نینە" و ب مەبەست رێگرییێ ل کارێن وان دکەن. کۆمپانی دبێژیت: "بزاڤ دهێنە کرن ب بریارێن زالمانە ئەم ژ بازارێ بهێینە دویرئێخستن."

دەستەیا راگەهاندن و گەهاندنا ئیراقێ، دوشەمبییێ 1ێ خزیرانا ئەڤ سالە، د راگەهاندنەکێ دا "هەلوەشاندنا کۆمپانیا کۆرەک تیلیکۆم" راگەهاند. دەستەیێ دیار کریە کو بریارا وان پشتبەستنە ب یاسایێ، پشتی کو بۆ وان دەرکەفتی کۆمپانیا [کۆرەک تیلیکۆم] "پێگیری گرێبەستا خۆ نەبوویە."

چارشەمبییێ 3ێ کۆمپانیا کۆرەک تیلیکۆم راگەهاندنەک بەلاڤکر و تێدا هاتیە، ژ سالا 2007ێ وەرە و ژ دەستپێکا وەرگرتنا مۆلەتا وان، تووشی "ستەم و زۆردارییێ" بووینە و ژ مافێن خۆ یێن سەرەتایی بێ-بەهربووینە، سەرباری وێ یەکێ ب هەمی مەرجێن حکومەتێ و لیژنەیا ڤەگوهاستن و گەهاندنا پەرلەمانێ ئیراقێ رازیبووینە.

ل گۆرەیی راگەهاندنێ، ئێک ژ کێشەیێن سەرەکی یێن دناڤبەرا کۆرەک و دەستەیا راگەهاندنێ دا، پەیوەندی ب "پاقژییا باجێ" ڤە هەیە. کۆرەک دبێژیت: "دەستەیێ رێگری داناینە هەمبەر بجهئینانا گرێبەستا پێکهاتنێ (التسویة)، ئەو ژی ژبەر رەتکرنا بەلگەنامەیا پاقژییا باجا هەرێما کوردستانێ کو جهێ سەرەکی یێ دامەزراندنا کۆمپانییێ یە."

کۆرەک تیلیکۆم ئاماژەیێ ب وێ یەکێ دکەت، وان هەمی ڕێکارێن یاسایی گرتینەبەر بۆ چارەکرنا کێشەیێ، لێ دەستەیا راگەهاندن و گەهاندنێ "ب مەبەست" نڤیسارێن فەرمی یێن بلندترین دەستهەلاتا بجهئینانێ یا حکومەتێ پشتگوههاڤێتینە و پەنا بۆ هەلوەشاندنا گرێبەستێ ل رێککەفتی 02-06-2026ێ بریە.

د بەرسڤا وان تۆمەتان دا کو دبێژن کۆرەک بۆ بجهئینانا گرێبەستێ یا جددی نینە، کۆمپانی دبێژیت: "ئەڤ چەندە بەروڤاژی راستییێ یە، پەیوەندییێن مە هەتا 31 -05-2026ێ بەردەوام بووینە. تەنانەت پشتی جەژنا قوربانی ژی، شاندەکێ بلند یێ کۆمپانیێ چوویە بەغدا بۆ دیتنا سەرۆکێ دەزگەهێ جێبەجێکار، لێ ناڤبری ل سەر دەم و ژڤانێ دیارکری خۆ ڤەدزییە."

کۆرەک تیلیکۆم هوشدارییێ ددەت کو ئەڤ جۆرە بریارە دێ بنە ئەگەرێ ژناڤچوونا ژێدەرێن داهاتێ گەنجینەیا گشتی و زیانگەهاندنێ ب "ملیۆنان پشکداربوویان" و کەرتی گەهاندنێ ب گشتی.

ل دویماهییا راگەهاندنێ، کۆمپانیا کۆرەک پشتراستییێ ددەتە پشکداربوویێن خۆ کو "بۆ پاراستنا مافێن وان، دێ پەنایێ بەرنە بەر هەمی رێکارێن یاسایی د دادگەهێن ناڤخۆیی و دەستووری دا و ئەڤێ چەندێ ب ئەمانەتەکێ ل سەر ملێن خۆ دزانن."