گاڤ

سەرۆک مەسعوود بارزانی راگەهاند، "چەکێ پێشمەرگەیی، پارچەئاسن و جبەخانە و کەرەستەیێ شەڕکرنێ نینە. چەکێ پێشمەرگەیی دیرۆک، فیداکاری، کەرامەت و بیروباوەرا وی یە".

پێنجشەمبییێ 4ێ خزیرانا 2026ێ، سەرۆک مەسعوود بارزانی ل سەر تورا جڤاکی یا ئێکس دەربارەیی چەکێ د دەستێ پێشمەرگەیی دا دبێژیت:"هەیامەکە ژ بەر وێ رەوشا سیاسی یا تایبەت یا کو هاتیە پێش، هندەک ئالی بەحس ل چەکێ پێشمەرگەیی دکەن و ل سەر وێ یەکێ لێکدانێن شاش و بۆچوونێن نەدروست ددەنە دیارکرن".

سەرۆک بارزانی ئاماژێ ب وێ یەکێ ژی دکەت، "ل ڤێرێ پێدڤییە هەمی ئالی وێ یەکێ ل بیرا خۆ بئینن کو پێشمەرگە ژدایکبوویێ خوین، رەنج و رۆندکێن گەلێ کوردستانێ یە".

سەرۆک بارزانی ئاماژێ ب وێ دکەت، "چەکێ پێشمەرگەی، پارچەئاسن و جبەخانە و کەرەستەیێ شەڕکرنێ نینە. چەکێ پێشمەرگەیی دیرۆک، فیداکاری، کەرامەت و بیروباوەرا وی یە. چەکێ پێشمەرگەیی ئەو سۆز و پێگیرییە یا کو هەردەم بۆ گەل، ئاخ و نیشتیمانێ خۆ هەیی".