شاخەوان عەبدوللا: پشتراستییەک هەیە مووچەیێ مووچەخۆرێن هەرێمێ وەک یێن ئیراقێ بهێتەدان

بەلاڤ بکە

 

گاڤ

سەرۆکێ فراکسیۆنا پارتی ل بەغدا رادگەهینیت کو د کۆمبوونا خۆ دا ل گەل وەزیرێ دارایی یێ ئیراقێ، سۆز پێ هاتیە دان کو هنارتنا مووچەیی بۆ هەرێما کوردستانێ یا بەردەوام بیت.

ئێکشەمبییێ 7ێ خزیرانا 2026ێ، شاخەوان عەبدوللا سەرۆکێ فراکسیۆنا پارتی ل پەرلەمانێ ئیراقێ راگەهاند، وان داخوازکریە کو بابەتی مووچەیی و داهاتێ ناڤخۆ ژ ئێکدو بهێنە جوداکرن دا کو فشار ل سەر ژیارا خەلکی دروست نەبیت.

شاخەوان عەبدوللا د زنجیرە سەرەدانەکێ دا بۆ وەزارەتێن دارایی، چاندن، ساخلەمییێ و دەرڤە، چەندین پرسێن هەستیار ل گەل بەرپرسێن بلند گۆتوبێژ کرن و ناڤەرۆکا وێ ژی ئاشکرا کر.

پرسا مووچێ فەرمانبەرێن هەرێمێ وەک گرنگترین تەوەرێ کۆمبوونان، ل وەزارەتا دارایی ل گەل فالح ساری هاتە گۆتوبێژکرن. شاخەوان عەبدوللا ئاماژە ب وێ چەندێ کر کو بڕینا بڕەکێ پارەیی ژ مووچەیێ مەهانە، بارگرانییەکا مەزن دروست کریە و گۆت: "پێدڤییە مووچە وەک خۆ بهێتە هنارتن؛ مە پێشنیازکریە کو ل شوینا بڕێ جهگیر یێ 120 ملیار دیناران، بتنێ نیڤا داهاتێ دروست یێ نەپەترۆلی رادەستی بەغدا بهێتەکرن."

ب گۆتنا شاخەوان عەبدوللا، وەزیرێ دارایی بەرهەڤییا خۆ بۆ هاریکارییێ دیارکریە و گۆت: "وەزیری ب رۆهنی گۆت کو ب سەرەدەریکرنا ل گەل هەرێما کوردستانێ دێ جودا بیت ژ وەزیرێ پێشتر و بنەمایێ کارێ وان دێ دادپەروەری بیت."

ل وەزارەتا چاندنێ، پرسا وەرگرتنا گەنمێ جۆتیاران و کێشەیێن ئەمنی یێن دەڤەرێن دابڕای هاتنە بەحسکرن. شاخەوان عەبدوللا تەکەزی ل سەر زێدەکرنا رێژەیا وەرگرتنا گەنمی کر. دەربارەیی رەوشا جۆتیارێن کەرکووکێ، ئاشکرا کر کو وەزیری پشتراستی دایە کو ئەڤسالە چو کێشەیێن دروینێ بۆ وان دروست نەبن و رێنمایی داینە چاندنا کەرکووکێ کو رێ بدەنە جۆتیاران زەڤییێن خۆ بدورن. وی ئاماژە ب وێ چەندێ ژی کر کو کێشە پتر "ئەمنی بوویە نەکو چاندنێ" و بزاڤ بۆ چارەکرنا بنەرەتی یا بڕیارێن سەردەمێ بەعس دهێنە کرن.

ئێک ژ کێشەیێن دی، رێگرییێن بازگان و گەندەلییێ بوو د ڤەگوهاستنا کەلوپەلێن بازرگانی دا. شاخەوان عەبدوللا داخواز کریە کو لێکتێگەهشتنا دناڤبەرا هەرێمێ و بەغدا دا ل سەر سیستەمێ "ئەسیکۆدا" ببیتە رێککەفتنەکا فەرمی دا کو ئەو زالگەهێن بووینە ژێدەرێ گەندەلییێ ب دویماهی بهێن و ئێدی بازرگان نەچار نەبن هەرێمێ چۆل بکەن.

د بابەتەکێ دی دا، پرسا کۆمکرنا چەکی د دەستێ دەولەتێ دا و پاشەرۆژا گرۆپێن چەکدار هاتە بەحسکرن. شاخەوان عەبدوللا ئاشکرا کر کو هندەک گرۆپ دخوازن فێلان بکەن و ئەو چەکێن رادەست دکەن نە یێن وانانە، بەلکو یێن وەلاتەکێ دەڤەرێ نە کو ناخوازیت چەک بهێنەدانان.

وی تەکەز کر کو ئالییێ ئەمریکی ب تەمامی ئاگەهداری ڤێ یەکێ یە و ژمارەیا چەکێن وان ژی ل بەردەستە. ئەڤ چەندە نیشان ددەت کو پرۆسەیا چەکدانانێ گەهشتیە قویناغەکا هەستیار و پێدڤی ب هەماهەنگییا ناڤدەولەتی هەیە.

زێدەتر دەربارەی