گاڤ

سەرۆکێ حکومەتا هەرێما کوردستانێ ل ناڤەندا گەنجان گۆتارەک پێشکێشکر و تێدا چەندین شیرەت و پەیمان ئاراستەی گەنجان کرن، ب تایبەتی د وارێن پاراستنا کولتووری، ناسنامەیا نەتەوەیی و گەشەپێدانا تەکنۆلۆژیایێ دا.

ئەڤ پەیاما ئاراستەکری بۆ تەخا گەنجان د دەمەکی دایە کو ئەڤرۆ ناڤەندا گەنجان (Youth Hub) ل هەولێرا پایتەخت هاتەڤەکرن و تێدا مەسروور بارزانی گۆتارەک پێشکێشکر.

مەسروور بارزانی د گۆتارا خۆ دا راگەهاند کو شیرەتا وی یا سەرەکی بۆ گەنجان ئەوە "دیرۆکا خۆ بخوینن" و تەکەز کر کو ئەوا ئەڤرۆ ئەم تێدا دژین بەرهەمێ خوینا شەهیدانە، و ب خێرا وێ خوینێ مە کوردستانەکا پێشکەڤتی هەیە.

سەرۆکێ حکومەتێ داخوازی ژ گەنجان کر کو جلکێن کوردی بکەنە بەر خۆ، کولتوورێ خۆ بپارێزن و چو جاران پشتا خۆ نەدەنە دابونەریتێن خۆ یێن ڕەسەن.

ل سەر ئاستێ گەشەپێدان و تەکنۆلۆژیایێ، مەسروور بارزانی سۆز دا کو ئامیرەیێن تەکنۆلۆژی یێن باش دێ ئێخنە بەر دەستێ گەنجان بۆ هندێ کو مفای ژێ ببینن، و گۆت: "پێدڤییە گەنجێن مە داهێنەربن."

هەروەسا ئاماژە دا وێ چەندێ ژی کو  بلا ئێدی گەنج هزر نەکەن دەنگێ وان ناهێتە بهیستن، د هەمان دەم دا داخوازی ژ وان کر کو ببنە پشکەک ژ پڕۆسەیێ و گۆت: "هاریکارییا مە بکەن بۆ پێشخستنا کەرتێ ئابۆری."