گاڤ

رۆژنامەیێن ناڤدار یێن جیهانی، ب تایبەت "نیویۆرک تایمز"، ئاشکرا دکەن کو ئسرائیل و ئەمریکا ب جددی ل سەر بکارئینانا هێزێن کوردی یێن رۆژهەلات وەک "کارتا سەرکەفتنێ" د شەڕێ زەمینی دژی ئیرانێ دا ڤەکۆلینێ دکەن.

ئەڤ راپۆرتێن نوی یێن رۆژنامەیێن جیهانی د دەمەکی دانە کو گرژییێن د ناڤبەرا واشنتۆن و تەهرانێ دا گەهشتینە بلندترین ئاست و هەردو ئالی ل سەر رەشنڤیسا رێککەفتنەکا 60 رۆژی د دانوستاندنێ دانە، لێ د هەمان دەم دا پلانا شەڕێ زەمینی ژی بەرهەڤە.

ل گۆرەی راپۆرتەکا رۆژنامەیا "نیویۆرک تایمز" (The New York Times) کو ئەیینییا 12ێ خزیرانێ هاتییە بەلاڤکرن، بەرپرسێن ئسرائیلی پێشنیارەکا فەرمی پێشکێشی ئەمریکا کرییە بۆ ڤەکرنا "بەرەیەکی زەمینی" ل رۆژئاڤایێ ئیرانێ ب رێیا شەڕڤانێن کوردێن رۆژهەلات یێن کو ل هەرێما کوردستانێ ئاکنجینە. رۆژنامەیێ ئاماژە ب وێ یەکێ کرییە کو ئەڤ هێزە د ئامادەباشییەکا توند دانە و دشێن ب ساناهی سنۆران ببڕن و شەڕی ببەنە ناڤ جەرگێ ئیرانێ.

ژ لایەکێ دی ڤە، پەیمانگەها ڤەکۆلینێن شەڕی (ISW) د راپۆرتا خۆ یا رۆژا پێنجشەمبی 11ێ خزیرانێدا دیار کرییە کو ئیران ب رێیا ئۆپەراسیۆنێن زانیارییان بزاڤێ دکەت فشارێ بئێخیتە سەر ئەمریکا دا کو مەرجێن وێ قەبویل بکەت، لێ د هەمان دەم دا تەهران گەلەک ژ بکارئینانا "کارتا کوردی" ژ لایێ ئەمریکا ڤە دترسیت. راپۆرت تەکەز دکەت کو هەر پێشڤەچوونەکا هێزێن کوردی ل سەر سنۆران، دێ بیتە ئەگەرێ گوهۆڕینا هەمی هەڤکێشەیێن شەڕی.

پەیوەندییا کوردێن رۆژهەلات ب شەڕێ ئەمریکا و ئیرانێ ڤە، دیرۆکەکا ئالۆز و تژی گۆمان هەیە. دۆنالد ترەمپ، سەرۆکێ ئەمریکا، بەری چەند مەهان ب ئاشکرایی گۆتبوو کو وان چەک بۆ کوردان هنارتینە، لێ حزبێن کوردی وەک PDKI و کۆمەلەیێ ب توندی ئەڤ چەندە رەت کربوو. شارەزا دبێژن ئەڤ رەتکرنە ژبەر ترسێ بوو ژ هێرشێن مۆشەکی یێن ئیرانێ بۆ سەر بنگەهێن وان ل هەرێما کوردستانێ. لێ د ڤان دو رۆژێن دویماهییێ دا، ب تایبەت پشتی گەفێن ترەمپی بۆ ژناڤبرنا شارستانییەتا ئیرانێ، ناڤێ کوردان جارەکا دی وەک هێزەکا کاریگەر د ناڤ رۆژنامەیێن جیهانی دا هاتییە پێش، کو ئەڤە نیشان ددەت ئەمریکا و ئسرائیلێ دڤێن د شەڕێ زەمینی دا پشتبەستنێ ل سەر وان بکەن دا کو زیانێن سەربازێن وان کێمتر بن.