گاڤ

د مۆندیالا 2026ێ دا کو نوکە ل ئەمریکا، مەکسیک و کەنەدا یا بەردەوامە، هەمی چاڤ ل سەر هەردو ستێرێن جیهانی مێسی و مباپێ نە، کا کی دێ ریکۆردا کلۆزێ شکێنیت و بیتە گۆلکارێ دیرۆکی یێ مۆندیالێ.

ئەڤ هەڤرکییە د دەمەکی دایە کو مۆندیالا 2026ێ ب فەرمی ل 11ێ ڤێ مەهێ دەستپێکرییە، و هەرسێ یاریزانێن ناڤدار د دیرۆکا مۆندیالێدا ژمارەیێن جودا یێن گۆلان تۆمارکرینە و چاڤەڕێی یارییێن خۆ یێن ئێکێ د ڤێ مۆندیالێ دا دکەن.

میرۆسلاڤ کلۆزێ، ستێرێ پێشتر یێ هەلبژارتییێ ئەلمانیا، هەتا نوکە ب 16 گۆلان وەک گۆلکارێ دیرۆکی یێ مۆندیالێ ل سەرێ لیستێ دهێت. ب دویڤ وی ژی را، لیۆنێل مێسی، کاپتنێ هەلبژارتییێ ئەرجەنتینێ، ب 13 گۆلان دهێت و ب تنێ 3 گۆلان ژ کلۆزێ دویرە. مێسی کو د مۆندیالا 2022ێ دا 7 گۆل تۆمارکرن، د ڤێ مۆندیالێ دا بزاڤێ دکەت ریکۆردا کلۆزێ بشکێنیت و ناڤێ خۆ د دیرۆکێ دا وەک گۆلکارێ ئێکێ تۆمار بکەت.

ژ لایەکێ دی ڤە، کیلیان مباپێ، ستێرێ گەنج یێ هەلبژارتییێ فڕەنسا، ب 12 گۆلان ل رێزا سێیێ دهێت و هەڤرکییەکا توند ل گەل مێسی و کلۆزێ دکەت. مباپێ کو ژیێ وی ب تنێ 27 سالە، د دو مۆندیالێن بۆری دا شیایە 12 گۆلان تۆمار بکەت، کو ئەڤە ژمارەیەکا مەزنە بۆ یاریزانەکێ د ژیێ وی دا. ئەو ب تنێ پێدڤی ب 4 گۆلانە دا کو بگەهیتە کلۆزێ و ب 5 گۆلان ژی دێ بیتە گۆلکارێ دیرۆکی یێ مۆندیالێ، کو ب گۆتنا شارەزایان ئەڤ چەندە بۆ وی گەلەک یا ب ساناهی یە.

ریکۆردا میرۆسلاڤ کلۆزێ یا 16 گۆلان ژ سالا 2014ێ وەرە نەهاتییە شکاندن، دەمێ وی د مۆندیالا بەرازیلێ دا گۆلا خۆ یا 16ێ دژی بەرازیلێ تۆمارکری و ریکۆردا رۆنالدۆیێ بەرازیلی شکاندی. مێسی و مباپێ د مۆندیالا 2026ێ دا د قویناغەکا زێرین دانە و هەردو هەلبژارتییێن وان ژی وەک دو بەربژارێن سەرەکی بۆ ناسناڤی دهێنە هەژمارتن، کو ئەڤە دەلیڤەیەکا مەزن ددەتە وان دا  پترییا یارییان بکەن و گۆلێن زێدەتر تۆمار بکەن دا کو ریکۆردا کلۆزێ یێ 12 سالی ب دوتماهی بهینن.

لیستا باشترین گۆلکارێن دیرۆکا مۆندیالێ:

میرۆسلاف کلۆزە - ئەلمانیا - 16 گۆل

رۆنالدۆ (دیاردە) - بەڕازیل - 15 گۆل

گێرد مۆلەر - ئەلمانیا - 14 گۆل

جۆست فۆنتێن - فڕەنسا - 13

لیۆنێل مێسی - ئەرجەنتین – 13

پێلێ - بەڕازیل – 12 گۆل

کیلیان مباپێ - فڕەنسا - 12 گۆل