گاڤ

سەرۆکوەزیرێ پاکستانێ رادگەهینیت چاڤەرێ دکەن د 24 دەمژمێرێن بهێن دا ئیمزایا ئەلکترۆنی ل سەر رێککەفتنا ئەمریکا  و ئیرانێ بهێتەکرن.

ئەڤ پەیاما پاکستانێ د دەمەکیدایە، کو د دو رۆژێن بۆریدا گەف و هێرشێن سەربازی یێن توند د ناڤبەرا واشنتۆن و تەهرانێدا گەهشتبوونە گۆپیتکێ، لێ بزاڤێن دبلۆماسی یێن ئیسلام ئابادێ هەڤکێشە بەرەڤ ئارامبوونێڤە برن.

د پۆستەکێ دا ل سەر تۆرا جڤاکی یا (X)، شەهباز شەریف نڤیسییە: "ئەم ژ هەر دەمەکی پتر ژ رێککەفتنا ئاشتیێ نێزیکین، و دهێتە پێشبینیکرن د 24 دەمژمێرێن بهێن دا رێککەفتن بهێتە ئێکلاکرن." وی دیار کر کو پاکستان بەرهەڤییان دکەت دا کو ئێکسەر پشتی ڤێ چەندێ، ئیمزاکرنا ئەلکترۆنی بۆ رێککەفتنێ بهێتەکرن، و د دویڤ دا د حەفتییا بهێت دا دێ دانوستاندن ل سەر ئاستێ تەکنیکی دەستپێکەن.

سەرۆکوەزیرێ پاکستانێ، کو وەلاتێ وی ناڤبەینکارا سەرەکی یا ڤێ پرۆسەیێ یە، سوپاسییا ویلایەتێن ئێکگرتی یێن ئەمریکا و کۆمارا ئیسلامی یا ئیرانێ کر بۆ پێگیریا وان یا بەردەوام د دەمێ دانوستاندنان دا، و د هەمان دەم دا بۆ پشتەڤانییا وان د سەرئێخستنا ڤێ پرۆسەیێ دا سوپاسییێن خۆ ئاراستەی وەلاتێن جیران و دەڤەرێ کرن.

شەڕێ ئەمریکا-ئسرائیل ل گەل ئیرانێ کو ل 28ێ مەها شوباتێ پشتی کوشتنا خامنەیی دەستپێکربوو و ب ئاگربەستەکێ هاتبوو سنۆردارکرن، بەری چەند شەڤان ب چەند هێرشێن دژوار هاتبوو دەستپێکرن، بەری چەند رۆژان ژی دۆنالد ترەمپ، سەرۆکێ ئەمریکا راگەهاند ب رێژەیەکا مەزنڤە دێ ل رۆژا دوشەمبێ ل گەل ئیرانێ رێککەڤن.