گاڤ

ل باژێرێ زاخۆ، ئێکەمین کۆنفرانسێ ناڤدەولەتی یێ تایبەت ب "ژیرییا دەستکرد د ئەندازیارییێ دا" ب پشکدارییا پسپۆر و مامۆستایێن چەندین زانکۆیێن ناڤخۆیی و دەرڤە دەستپێکر، تێدا ئالنگاری و دەلیڤەیێن وێ تەکنەلۆژیا نوی ل سەر کەرتێ ئەندازیارییێ هاتنەگۆتوبێژکۆن.

چارشەمبییێ 17ێ خزیرانا 2026ێ، ب بەرهەڤبوونا هژمارەکا پسپۆر و ڤەکۆلەران، کۆنفرانس ژ ئالییێ زانکۆیا زاخۆ ڤە و ب هەڤپشکی ل گەل زانکۆیێن (شرنەخ، سۆران، پۆلیتەکنیکیا دهۆک و ئاکرێ) دەستپێکر و بڕیارە دو رۆژان بەردەوام بیت. ئارمانجا سەرەکی یا کۆنفرانسی، نیشاندانا نویترین ڤەکۆلینانە ل سەر کارتێکرنێن ژیرییا دەستکرد ل سەر ئەندازیارییێ ب گشتی و تەلارسازییێ ب تایبەتی.

دیندار شەمسەدین، ئێک ژ رێکخەرێن کۆنفرانسی بۆ گاڤ راگەهاند: "ئارمانجا مە ژ ڤی کۆنفرانسی دیارکرنا کارتێکرن و مەترسییێن ژیرییا دەستکردە ل سەر پاشەرۆژا ئەندازیارییێ."

وی رێکخەرێ کۆنفرانسی تەکەزی ل سەر گرنگییا خۆگونجاندنێ ل گەل ڤان گوهۆرینان کر و گۆت: "ئەگەر ئەم داهێنەرێن ژیرییا دەستکرد ژی نەبین، دڤێت ب رێیا زانست، کولتوور، زمان و پرۆگرامێن تایبەت یاسایان بۆ دابنین، چونکی پاشەرۆژا مە یا گرێدایی وان پێشکەفتنێن جیهانی ڤە یە."

دەربارەیی ئاستێ زانستی یێ کۆنفرانسی، دیندار شەمسەدین ئاماژە ب وێ چەندێ کر کو 67 ڤەکۆلین هاتبوونە پێشکێشکرن، لێ پشتی هەلسەنگاندنێ، تنێ 27 ڤەکۆلین هاتنەوەرگرتن. بەحسێ وێ چەندێ ژی کر کو ل رۆژا ئێکێ دا 10 ڤەکۆلین د دو هۆلێن جودادا هاتنە پێشکێشکرن و بریارە د رۆژا دویێ دا 17 ڤەکۆلینێن دی بهێنەپێشکێشکرن.

رێکخەرێن کۆنفرانسی هیڤی دخوازن مامۆستا و قوتابییێن خواندنا بلند مفایەکێ زانستی یێ باش ژ ڤێ چالاکییێ وەرگرن داکو مل ب ملێ وەلاتێن پێشکەفتی گاڤان بهاڤێژن. بریارە ژی پشتی ب دویماهیهاتنا کۆنفرانسی، هەمی ڤەکۆلینێن هاتینەوەرگرتن د چوارچۆڤەیێ پەرتووکەکێ دا بهێنە چاپکرن و بەلاڤکرن، دا کو ببیتە ژێدەرەک بۆ نفشێن پاشەرۆژێ و قوتابییێن زانکۆیێ.