گاڤ

رێکخراوا ساخلەمییا جیهانی رادگەهینیت، بەحسێ ئەگەرێ وێ هەمی گیانژدەستدانێ دکەت یا کو ل ئەورۆپا ژ بەر بلندبوونا پلەیێن گەرمێ هاتیە تۆمارکرن و دبێژیت: ئەگەرێ وێ هاتنا گەرمێ یا بەروەخت بوویە.

د. تێدرۆس ئادهانۆم، سەرۆکێ رێکخراوا ساخلەمییا جیهانی دبێژیت: ژ 21ێ حزیرانێ وەرە پترتر ژ 1,300 حالەتێن گیانژدەستدانێ ب گەرمێ ل ئەورۆپا هاتینە تۆمارکرن. وی گۆت: "لێدانا گەرمێ گەلەک جاران ب 'کوژەکێ بێدەنگ' دهێتە ناڤکرن، خانی، جهێن کاری و قوتابخانەیێن ئەورۆپا بۆ ڤان پلەیێن گەرمێ نەهاتینە دروستکرن''.

فڕەنسا ئێک ژ وان وەلاتانە یێ کو پترین قوربانییێن لێدانا گەرمێ تێدا هاتینە تۆمارکرن، ساخلەمییا وی وەلاتی راگەهاند، ژ رۆژا چارشەمبیێ وەرە نێزیکی هزار حالەتێن گیانژدەستدانێ هاتینە تۆمارکرن کو پترییا وان د سەر 65 سالیێ دانە.

ل گۆرەیی پەیمانگەها سەقاناسی و ب رێڤەبرنا ئاڤێ (IMGW)، پلەیێن گەرمێ ل وەلاتێن ئەورۆپا د اڤبەرا 35 بۆ 42 پلەیێن سیلیزی دا بووینە و د وێ پلەیێ ژی دا پترین قوربانی هاتینە تۆمارکرن.

ئەگەرێن گیان ژ دەستدانێ ژبەر گەرمێ دبیت ئەڤێن ل خوارێ بن؛

● چوونا خوینێ بۆ پێستی.

● خوین ژ ئەندامان دچیتە بۆ پێستی.

● ژەهر و هەودان (ئیلتیهابات) د ناڤ ئەندامان دا.

● سستبوونا ئەندامان.

● کێمبوونا پەستایا خوینێ.

● زێدەبوونا لێدانێن دلێ.

● جەلتەیا دلێ.

● خوهدانا بەردەوام.

● کێمییا ئۆکسجین و ماددەیێن خوارنێ.

● نیشانێن هشکبوونا لەشی.

● سستبوونا گولچیسکان.

چەند رێنمایەک بۆ خۆپاراستنێ ژ گەرما هاڤینێ؛

● دەرکەفتن د دەمێن هین دا وەک سپێدەهییان، ئێڤاری و شەڤان.

● ل دەمێ دەرکەفتنا نیشانێن لێدانا گەرمێ، نۆشداری ئاگەهدار بکە.

● زارۆک و دانعەمر (بسەرڤەچوویی) هەردەم ئاڤێ ڤەخۆن و نەچنە بەر گەرمێ.

● دویربکەڤە ژ وان خوارنێن کو هشکبوونا لەشی زێدە دکەن.

● ئەوێن نەخۆشییێن دەمدرێژ هەین پێگیر بن ب بکارئینانا دەرمانێن خۆ و خۆ ژ سەقایێ گەرم بپارێزن.

  ● ل دەمێ چوونا بەر گەرمێ کولاڤ، سیهوان، بەرچاڤک و جلگێن هچکدرێژ بکاربئینە.