گاڤ

وەزارەتا بازرگانی و پیشەسازی یا حکومەتا هەرێما کوردستانێ، نویترین ئامارێن گرێدایی وەرگرتنا گەنمێ جۆتیاران، دابەشکرنا پشکا خوارنێ و لڤینا بازرگانی یا شەش مەهێن بۆری بەلاڤکرن و راگەهاند، پرۆسەیا وەرگرتنا گەنمی بەردەوامە و چەندین سایلۆیێن نوی ژی دێ کەڤنە د خزمەتا جۆتیاران دا.

ل گۆرەیی راپۆرتەکا وەزارەتا بازرگانی، ژ 12ێ خزیرانا 2026ێ وەرە پرۆسەیا وەرگرتنا گەنمێ جۆتیاران دەستپێکریە و هەتا نوکە بڕێ 277,695 تەنێن گەنمی ل سایلۆیێن هەرێما کوردستانێ هاتینە وەرگرتن، کو ب ڤی رەنگێ ل خوارێ ب سەر پارێزگەهان دا هاتیە دابەشکرن:

● سایلۆیێن پارێزگەها دهۆکێ: 96,450 تەن.

● سایلۆیێن پارێزگەها سلێمانییێ: 86,297.600 تەن.

● سایلۆیێن پارێزگەها هەولێرێ و کەندیناوە: 94,947 تەن.

دەربارەیی پشکا خوارنێ یا مەهانە و پسوولا ئەلکترۆنی وەزارەتا بازرگانی ئاماژە ب وێ چەندێ کریە، نوکە پشکا ئاری یا چارێ هاتیە دابەشکرن و بتنێ ل سلێمانییێ پشکەکا کێم مایە، پشتی هینگێ ژی دێ دەست ب دابەشکرنا پشکا پێنجێ هێتە کرن. د هەمان دەم دا دابەشکرنا پشکا خوارنێ یا چارێ یێ وەلاتییان ژی دەستپێکریە. ژ ئالییەکێ دی ڤە، خزمەتگۆزارییا زێدەکرنا زارۆکان و هەڤژینان د پسووولا خۆراکی دا هاتیە کاراکرن و بریارە ل نێزیک خزمەتگۆزارییا "ڤەگوهاستنا پسوولێ" ژی بهێتە کاراکرن.

دەربارەیی چاڤدێرییا بازاری و چالاکی د شەش مەهێن بۆری دا، تیمێن چاڤدێرییا بازرگانی 24,746 سەرەدان کرینە، کو دەرئەنجامێ وێ ب ڤی رەنگی بوویە:

● 807 حالەتێن سزادانێ.

● 102 جهـ هاتینە داخستن.

● سەرجەمێ وی پارەیێ جهـ پێ هاتینە غەرامەکرن: 182,296,000 دینار.

● گرتنا 111,808 تەنێن کەلوپەلێن دەمبسەرڤەچوویی یان نە-یاسایی.

دەربارەیی لڤینا بازرگانی و مۆلەتنامەیان، د نیڤا ئێکێ یا سالا 2026ێ دا، 155 مۆلەتنامەیێن هنارتنێ و 1,038 مۆلەتنامەیێن هاوردەکرنا کەلوپەلان هاتینە دان. هەروەسا 333 مۆلەتنامەیێن هاوردەکرنا ترومبێلان هاتینە دان و د وێ هەیامێ دا 52,001 ترومبێل هاوردەیی هەرێما کوردستانێ هاتینە کرن. وەزارەتا بازرگانی ئاشکرا ژی کر کو ژبەر بجهئینانا سیستەمێ "ئەسیکۆدا"، ژمارەیا مۆلەتنامەیان ب هەڤبەری ل گەل سالا چوویی کێمبوویە.

بۆ پلانێن پاشەرۆژێ یێن وەزارەتێ، وەزارەتا بازرگانی چەند پرۆژەیەکێن ستراتیژی بۆ پاشەرۆژێ راگەهاندینە، ژ وان ژی:

● کارکرن د پرۆژەیێ چێکرنا سایلۆیا کۆیە و زاخۆ دا، هەروەسا سایلۆیا هەلەبجە 90% ژ کارێ وێ هاتیە ب دویماهیئینان.

● ڤەکرنا نڤیسینگەها رێڤەبەرییا گشتی یا بازرگانی ل دەرگەهێن سنۆری یێن پەروێزخان و باشماخ.

● ئەلکترۆنیکرنا ئاشان بۆ باشترکرنا چاڤدێرییا کوالێتییا ئاری.

● پێکئینانا لیژنەیەکا بلند ب فەرمانا سەرۆکوەزیران بۆ دەستنیشانکرنا بهایێ کڕینا گەنمێ جۆتیاران ژ ئالییێ کۆمپانییێن نیشتیمانی و سەرمایەدارانڤە، ل گەل ئاسانکارییان بۆ هنارتنا گەنمی بۆ دەرڤەیی وەلاتی.