ئاده‌م رزگار
سیاسەتا سەرۆک نێچیرڤان بارزانی، لسەر شه‌نگستێ"ستراتیژییا نەرم" و دیتنا زمانەکێ هەڤپشک هاتیە داڕشتن؛ ڕێچکەیەک دویرە ژ توندڕەوی و ئالۆزیێ و پشتبەستییە ب دیالۆگ، لێکتێگەهشتن و ڕێزگرتنا دوئالى. ڤێ دیتنا هه‌ڤسەنگ وەکرییە، ئالۆزترین تەنگاڤیێن سیاسی و نێڤدەولەتی، ل شوینا گرژییێ، لسەر مێزا دانوستاندنێ بهێنە چارەکرن. ژ به‌رڤێ ئێكێ ئەو، لسەر ئاستێ ئیراقێ وەک ناڤبه‌ینكاره‌كێ باوه‌رپێکری و مەرجەعێ چارەسەریێ دهێتە دیتن، لسەر ئاستێ جیهانێ ژی وەک سەرکردەیەکێ ڤەکری و خودان پێگەهەکێ هه‌ڤسەنگ دهێتە نیاسین.
د هەمان دەم دا، کارکرنا وی یا بەردەوام بۆ كویركرنا فەرهەنگا پێکڤه‌ژیانا ئاشتییانە یا د ناڤبەرا سەرجەم پێکهاتەیێن نەتەوەیی و ئایینییێن کوردستانێ دا، وێنەیه‌کێ گەش و شارستانی ژ لێبۆرین و مافێن مرۆڤی نیشا جیهانێ دایە.
دیرۆكا نێزیک یا هەرێما کوردستانێ شاهده‌ییا وێ ڕاستیێ ددەت ل سەردەمێن هەرە دژوار و پڕ ژ قەیران،ئارامی و پێشبینییێن هویر یێن نێچیرڤان بارزانی، کەنارێ پشتڕاستییێ بۆ گەلێ کوردستانێ دەستەبەر کرییە. ئەو ب دپلۆماسییه‌كا بێدەنگ لێ کاریگەر، شیا دۆرپێچێن نێڤدەولەتیو هەرێمی بشکێنیت و دەرگەهێن گرتى یێن پایتەختێن بڕیاربدەست یێن جیهانێ ب روویێ کوردستانێ دا ڤەکەت.
ل دوماهییێ، دشێین بێژین ئەو قوتابخانەیەکا جودایه‌د رێڤەبرنێ دا؛ قوتابخانەیەک د سەلمینیت سەرکرداتییا ڕاستەقینە د قێڕقێڕ و چێکرنا هوسێ دا نینە، بەلکو د وێ حکمەتێ دا یە ئەوا دشێت د ناڤبەرا نەحەزان دا پرێن باوه‌رییێ ئاڤا بکەت و وەک مه‌تاله‌ك بهێز، بەرژەوەندیێن بلند و دەستکەڤتێن گەلێ کوردستانێ بپارێزیت.