گاڤ

وەزارەتا پەروەردەیێ یا حکومەتا هەرێما کوردستانێ، رێکار و مەرجێن وەرگرتن و تۆمارکرنا زارۆک و قوتابییان بۆ سالا خواندنێ 2025-2026 ل سازییێن پەروەردەیی یێن حکۆمی راگەهاندن و ژییێ وەرگرتنێ ژی دیارکر.

ل گۆرەیی نڤیسارەکا فەرمی یا وەزارەتا پەروەردەیێ کو ئیمزا ئالان حەمەسەعید، وەزیرێ پەروەردەیێ ل سەرە، پرۆسەیا وەرگرتنێ ل باخچەیێن زارۆکان و پۆلا ئێکێ یا بنەرەتی ل رێککەفتی 15/7/2026 دێ دەستپێکەت و هەتاکو 19/8/2026 دێ یا بەردەوام بیت.

مەرجێن ژیێ وەرگرتنێ ب ڤی رەنگی نە:

● باخچەیێ زارۆکان (حکۆمی):

قویناغا ئێکێ: ئەو زارۆکێن دناڤبەرا (1/1/2022 تا 31/12/2022) دا ژدایکبووین.

قویناغا دویێ: ئەو زارۆکێن دناڤبەرا (1/1/2021 تا 31/12/2021) دا ژدایکبووین.

● پۆلا ئێکێ یا بنەرەتی:

تنێ وان قوتابییان ڤەدگریت یێن دناڤبەرا (1/1/2020 تا 31/12/2020) دا ژدایکبووین.

● تۆمارکرن د سیستمێ "E-parwarda" دا:

وەزارەتا پەروەردەیێ ئاماژە ب وێ چەندێ کریە کو فەرە هەتاکو رێککەفتی 20/8/2026 هەمی پۆل بهێنە ژئێکجوداکرن و ناڤێن زارۆک و قوتابییان د سیستمێ ئەلکترۆنی یێ (E-parwarda) دا بهێنە تۆمارکرن. هەروەسا، رێککەفتی 6/9/2026 وەک دویماهی مۆلەت بۆ دابەشکرنا پشکاوانەیێن مامۆستایان و جهگرکرنا خشتەیێ خواندنێ هاتیەدیارکرن.

دەربارەیی وەرگرتنێ ل پەیمانگەهان، د نڤیسارێ دا هاتیە کو وەرگرتن دێ ل گۆرەیی رێنمایێن گشتی یێن رێڤەبەرییا گشتی یا پەیمانگەهان بیت، لێ بۆ وان پەیمانگەهێن پیشەیی یێن کو ب سیستمێ ئینگلیزی دخوینن، پێشکێشکرن دێ تنێ ب شێوازێ ئەلکترۆنی بیت.

ئەڤ بریارە هەمی رێڤەبەرییێن گشتی یێن پەروەردەیێ ل (هەولێر، سلێمانی، دهۆک، هەلەبجە، گەرمیان، راپەرین، سۆران و خواندنا کوردی ل کەرکووک) ڤەدگریت.