سەرۆک نێچیرڤان بارزانی سەرەخۆشییێ ل مالبات و کەسوکارێن کازم شانەدەری دکەت
گاڤ
سەرۆک نێچیرڤان بارزانی پەیامەکا سەرەخۆشییێ بۆ وەغەرا دویماهییێ یا پێشمەرگەیێ دێرین "کازم شانەدەری" بەلاڤکر و راگەهاند، خودێ ژێ رازی نموونەیا مرۆڤەکێ قوربانیدەر و نیشتمانپەروەر بوو کو هەمی ژیانا خۆ ژ پێخەمەت دۆزا رەوا یا گەلێ خۆ دەربازکر.
د پەیاما خۆ دا، سەرۆکێ هەرێما کوردستانێ ئاماژەیێ ب دیرۆکا خەباتا وی پێشمەرگەیی دکەت و دبێژیت: کازم شانەدەری هەڤڕێ و یاوەرێ مەلا مستەفا بارزانی بوویە ل کۆمارا کوردستانێ و پشکداربوویە د کاروانێ دیرۆکی یێ بەرەڤ ئێکەتییا سۆڤیەتا بەرێ.
سەرۆک نێچیرڤان بارزانی د پەیاما خۆ دا دبێژیت: "سەرەخۆشییێن خۆ یێن کویر پێشکێشی مالبات و کەسوکارێن وان یێن رێزدار دکەم، هەڤسۆز و هەڤخەمێ وانم. ژ خودایێ مەزن داخوازم گیانێ وی ب دلۆڤانییا خۆ شاد بکەت و سەبر و هەدارێ بدەتە هەمییان."
سەرۆکێ هەرێما کوردستانێ بەحسێ وێ یەکێ ژی کریە: "کازم شانەدەری، نموونەیا مرۆڤەکێ قوربانیدەر، نیشتیمانپەروەر، پاقژ و دلسۆزێ کورد و کوردستانێ بوو کو د شۆرەشێن کوردستانێ دا ل گەل هەڤڕێ، هەڤهزر و هەڤسەنگەرێن خۆ، هەمی ژیانا خۆ ژ پێخەمەت ماف، دۆزا رەوا، سەرفرازی و ئازادییا گەلێ خۆ بوۆراند و د وێ رێکێ دا رەنج و ماندیبوون و زەحمەتەکا مەزن کێشا."