گاڤ

ئەڤرۆ رۆژا چارشەمبی ئیتالیا د رێورەسمەکێ تایبەت دا ل هەولێرێ دێ بلندترین پلەیا رێزلێنانێ پێشکێشی نێچیرڤان بارزانی، سەرۆکێ هەرێما کوردستانێ کەت.

د رێورەسمان دا نیکۆلۆ فۆنتانا، بالیۆزێ ئیتالیا ل ئیراقێ ب نوینەراتییا سێرگیۆ ماتارێلا، سەرۆککۆمکارێ ئیتالیا دێ مەدالیا ستێرا ئیتالیا پێشکێشی سەرۆک نێچیرڤان بارزانی کەت، مەدالیا بلندترین مەدالیا ئیتالیا یە بۆ کەسێن د ژیانێ دا مایی.

مێژوویا مەدالیایێ:

ئەڤ خەلاتێ مێژووی بۆ سالا 1947 ڤەدگەریت، ل وی دەمی ن ناڤێ نیشانا ستێرا هەڤسۆزیا ئیتالیا بوو و پتر بۆ رێزلێنانێ بوو بۆ وان کەسێن پشتی شەڕێ دویێ یێ جیهانی رۆل د ئاڤەدانکرنا وی وەلاتی دا هەبوو، لێ ل سالا 2011ێ ل سەر دەستێ جۆرجیۆ ناپۆلیتانۆ، سەرۆککۆمارێ یازدێ یێ ئیتالیا یاسا هاتە هەموارکرن و ناڤ و ئارمانجێن وێ هاتنە گوهۆڕین.

ئارمانجا خەلاتی ژ ئاڤەدانکرنێ بۆ بلندکرنا شکۆیا نشتیمانی یا ئیتالیا ل دەرڤەیی وەلاتی بۆ پەرەپێدانا پەیوەندییێن دۆستانە و هەڤکارییا نێڤدەولەتی هاتە گوهۆڕین، ئەڤ رێزلێنانە نوکە ب فەرمانەکا سەرۆکاتییا دهێتە دان.

چەوا خەلات دهێتە دان؟

پرۆسەیا دیارکرنا وەرگرتنا ڤێ مەدلیایێ گەلەک یا ب دیتەیلە، ل دەستپێکێ وەزیرێ دەرڤە یێ ئیتالیا ژمارەکا ناڤان پێشنیاز دکەت، پشتی ڤێ جڤاتەکا 5 کەسی یا تایبەت ب رێزلێنانێ ڤە کەسێن ژ هەژی بۆ مەدالیایێ دەستنیشان دکەن و پاشی وان ناڤان ددەنە سەرۆککۆماری.

ئەڤ خەلاتە بتنێ بۆ بوارێ سیاسەتێ نینە، نەلکو رێزگرتنە ل وان کەسێن د بوارێ زانست، یەکنۆلۆژیا، چالاکییێن مرۆڤی و بازرگانی و کلتووری و هۆنەری ژی رۆلێ خۆ دگێڕن و پەیوەندییان ل گەل ئیتالیا بهێز دکەن.

پلەیێن مەدالیایێ:سیستەمێ مەدالیایێ ژ پێنج پلەیێن سەرەکی پێکدهێت:

سوارچاک: پلەیا ئێکێ یە.

ئەفسەر: پلەیا دویێ یە.

فەرماندە: پلەیا سێیێ یە.

ئەفسەری بلند: پلەیا چارێ یە.

سوارچاکییا خاچا مەزن: ئەڤە بلندترین پلەیا نیشانێ یە کو دێ ب سەرۆک نێچیرڤان بارزانی هێتە دان.