مه‌داليایا ستێرا ئيتالی ده‌ربازى رێزگرتنێ دبيت
بەلاڤ بکە
د. ئه‌رشه‌د حيتۆ
به‌خشينا مه‌داليیێن بلند د په‌يوه‌ندیيێن ناڤده‌وله‌تى دا وه‌ک رێزگرتنا تاكه‌كه‌سى ناهێنه‌دان، به‌لكو به‌خشينا ڤێ مه‌دالیيێ دناڤا خۆ دا گه‌له‌ک په‌يامێن سياسى و دیپلۆماسى هه‌لدگريت، كو ره‌نگڤه‌دانا سروشتێ په‌يوه‌ندیيێن دناڤبه‌را ده‌وله‌ت و به‌رژه‌وه‌ندییێن هه‌ڤپشک دگه‌هينيت. له‌ورا به‌خشينا مه‌داليایا ستێرا ئيتاليا بۆ سه‌رۆكێ هه‌رێما كوردستانێ، گرنگیيه‌كا زێده‌تر ژ ره‌هه‌ندێ پرۆتۆكۆلێ وه‌ردگريت.
ئه‌ڤ خه‌لاته د چارچۆڤەیێ گه‌شه‌كرنا په‌يوه‌ندیيان دایه دناڤبه‌را ئيتاليا و هه‌رێما كوردستانێ د بياڤێن ئێمناهیيێ، دژه تيرۆر، ئابۆرى، ره‌وشه‌نبيرى. هه‌روه‌سا ده‌ربڕينه‌كه بۆ وی رۆلێ رێزدار نێچيرڤان بارزانى د گه‌شه‌كرنا په‌يوه‌ندیيێن ناڤده‌وله‌تى دا ديتى، هه‌روه‌سا به‌رده‌وام شيايه ده‌ڤه‌رێ ل هەمبه‌ر گه‌فێن سياسى، و ئێمناهییێ و ئۆلى سه‌قامگير بكه‌ت.
ئه‌ڤ مه‌داليیە، ده‌ربڕينه‌كه بو نيشاندانا باوه‌رى و بهێزكرنا گه‌شه‌كرنا په‌يوه‌ندیيان دناڤبه‌را ئيتاليا و هه‌رێما كوردستانێ دا، هه‌ر دڤى چوارچۆڤەیی دا ئيتاليا رێزدار نێچيرڤان بارزانى وەک ئێک ژ سياسيیێن هه‌ره-كاريگه‌ر دبینیت كو شيايه كه‌نالێن دانوستاندنێ ل گه‌ل هێزێن ناڤدەولەتی بپارێزيت و هه‌رده‌م بۆ چه‌سپاندنا سياسه‌ته‌كێ ل سه‌ر هه‌ڤسه‌نگى و ده‌رگەھ‌ڤه‌كرنێ كاركريه؛ كو ئه‌ڤه‌ژى بوويه جهێ گرنگیپێدان و خۆشحالیيا گه‌له‌ک ژ ده‌وله‌تێن ئه‌ورۆپى، چونكی دیپلۆماسيیه‌تا ئه‌ورۆپى گرنگيیێ زێده‌تر ب وان په‌يوه‌نديیان ددەت یێن کو تێدا ئێمناهييا هه‌رێمى لێ يا به‌رقه‌رار بيت.
ل دویماهیيێ، ئه‌ڤ مه‌داليایا ئيتالى په‌يامه‌كا سياسیيه؛ په‌يامه‌كه داكۆكیيێ ل وێ راستیيێ دكه‌ت كو په‌يوه‌نديیێن دناڤبه‌را ئيتاليا و هه‌رێما كوردستانێ چووينه د قویناغه‌کا پێگه‌هشتى و باوه‌ريیەکا هه‌ڤپشک دا، له‌و د وێ باوه‌رێداينه كو ئه‌ڤ هه‌ڤكاریيا دناڤبه‌را هه‌ردو ئالییان دا، دێ يا به‌رده‌وام بيت و به‌رفره‌هتر لێهێت، كو گه‌له‌ک بوارێن ديتر مينا: ئاسايش، ئابۆرى، له‌شكه‌رى، ره‌وشه‌نبيرى، گه‌شه‌كرنا مرۆڤى بخۆڤه‌بگريت، كو خزمه‌تا هه‌ردو ئالییان تێدا بهێته‌كرن.
