ل نیڤا بیابانا رۆژئاڤایێ ئیراقێ، ل ڤان دویماهییان پەقینەکا سیاسی و ئەمنی یا مەزن رویدا. راپۆرتێن ئەمریکی و رۆژئاڤایی پەردە ل سەر سۆپرایزەکا گەلەک مەزن لادا؛ ئەوژی هەبوونا هندەک بنگەهێن سەربازی یێن ئسرائیلێ یێن نهێنییە کو بێی ئاگەهدارییا بەغدا کاردکەن. ئەڤ پێشڤەچوونە وەک بنپێکارییەکێ ل سەر سەروەرییا ئیراقێ د هەڤکێشەکا ئالۆز دا هاتە دیتن، تۆرەبوونا جاددەیێ ژ ئالییەکیڤە و تۆمەتبارکرنا واشنتۆنێ ب پاراستنا ئسرائیلێ ژ ئالییەکێ دیڤە، کو دبیت ئیراقێ بکەتە گۆرەپانەکا شەڕێ ب وەکالەت د هەڤکرییەکا هەرێمی یا ڤەکری دا.

ئەڤ راپۆرتە رۆناهییێ دئێخیتە سەر چەندین خالێن گرنگ دەربارەیی ئاڤاکرنا بنگەهێن ئسرائیلێ یێن نهێنی ل ژێر سیبەرا ئەمریکی ل بیابانا ئیراقێ، ب مەبەستا بکارئینانا وان د شەڕێ دژی ئیرانێ دا، کو ئەڤێن ل خوارێ نە:

● ئەرێ ئیراق هێشتا خودانا بریارا خۆیە یان بوویە مێزا ڤاڤارتنا حساباتان دناڤبەرا هێزێن مەزن دا؟

● ئەرێ ئاشکرابوونا بنگەهێن ئسرائیلێ لاوازییا دەستهەلاتێ و بنپێکرنا سەروەرییێ نیشان نادەت؟

● تۆرەبوونا جاددەیێ، پەرلەمانی و داخوازییێن ڤەکۆلینێ و سزادانا بەرپرسان.

● رۆلێ واشنتۆنێ د ڤەشارتنا 'چالاکییێن ئسرائیلێ یێن تاوانبارانە' دا.

● بنگەهەکێ نهێنی یێ دویێ و نهێنییا "چالاکییا ئسرائیلێ" ل بیابانا ئیراقێ چییە؟

● ئیراق دناڤبەرا واشنتۆن و تەهرانێ دا؛ هەڤسەنگییەکا هەرێمی یا لەرزۆک کو ئالۆزی گەفان لێ دکەن.

● پاشەرۆژا پەیوەندییێن ئیراق و ئسرائیلێ ل ژێر سیبەرا دوژمنکارییەکا نوی چییە؟

 

راپۆرتێن ئەمریکی و رۆژئاڤایی پەردە ل سەر هەبوونا بنگەهەکێ سەربازی یێ ئسرائیلێ یێ دویێ ل بیابانا رۆژئاڤایا ئیراقێ لادا، ئەڤە ژی د چارچۆڤەیێ پێشڤەچوونەکێ دا کو رۆناهییێ دئێخیتە سەر قەبارەیێ هەماهەنگییا ئۆپەراسیۆنی یا ئسرائیلێ د دەما شەڕێ ڤێ دویماهییێ یێ دژی ئیرانێ دا، د هەمان دەم دا پرسیارێن جددی ل ناڤخۆییا ئیراقێ دەربارەیی سەروەرییێ و رۆلێ ئەمریکا د ڤەشارتنا چالاکییێن ئسرائیلێ دا ل ناڤا ئاخا وەلاتی پەیدا دکەن.

قەیران ل دەستپێکا مەها ئادارا 2026ێ دەستپێکر، دەما شڤانەکێ ئیراقێ تەرش و کەوالێ خۆ دچەراند و لڤینەکا سەربازی یا گۆماناوی ل ناوچەیێ دیت و رویدان زێدەتر گەرمبوون دەما سوپایێ ئیراقێ هێزەک بۆ ڤەکۆلینێ رەوانەیی وێ دەڤەرێ کری و کەفتییە بەر گولەبارانەکێ و بوو ئەگەرێ کوشتنا سەربازەکی و برینداربوونا هندەکێن دی و پاشی دیاربوو کو بنگەهـ یێ ئسرائیلێیە.

 

شڤانەک "نهێینیا سەربازی" ئاشکرا دکەت

ل گۆرەیی راپۆرتێن ناڤدەولەتی، شڤانەکێ ئیراقی ب ناڤێ عەواد ئەلشەمەری د رەوشەکا نەدیار دا هاتە کوشتن پشتی کو جهەکێ سەربازی یێ نهێنی ل بیابانا رۆژئاڤا کەشف کری، دهێتە گۆتن وەک بنگەهەکێ ئسرائیلێ بۆ پشتەڤانییا ئۆپەراسیۆنێن ئەسمانی ل دژی ئیرانێ دهاتە بکارئینان. ل مەها ئادارێ، شڤانێ ئیراقی عەواد ئەلشەمەری یێ 29 سالی ل گەل برایێ خۆ د گەشتەکا کڕینێ یان راڤکرنێ دا بوون ل ناوچەیا "شەنانە" یا نێزیک ناوچەدارییا "نوخەیب" ل پارێزگەها ئەنبارێ، دەما هندەک لڤینێن سەیر ل هندەک نزماییێن بیابانێ دیتین. ل گۆرەیی گۆتنێن ئاکنجییێن وێ ناوچەیێ، شەمەری هەلیکۆپتەر، سەرباز و خیڤەت ل نێزیک جاددەیەکا دادانا فرۆکەیان ل ناوچەیەکا بیابانی یا دویر دیتبوون، بەری کو پەیوەندی ب دەستهەلاتا سەربازی یا ئیراقێ بکەت بۆ ئاگەهدارکرنێ. پشتی چەند دەمژمێران، ترومبێلا وی کەفتە بەر گولەبارانا هەلیکۆپتەرەکا نەنیاس و بوو ئەگەرێ کوشتنا وی و سۆتنا ترومبێلا وی ب تەمامی.

ئەڤ رویدانە بوو ئەگەرێ هندێ کو یەکەیەکا هەوالگیری یا ئیراقی بۆ ناوچەیێ بهێتە رەوانەکرن، لێ ئەو ژی کەفتەبەر هێرشەکا ئەسمانی. ل گۆرەیی بەرپرسێن ئیراقی، پەیوەندی ب ئالییێ ئەمریکی هاتەکرن و وان رەتکر کو ئەو هێرشە یا وان بیت، ڤێ چەندێ ئەو باوەری ل نک بەغدا دروستکر کو ئەو جهە ژ ئالییێ ئسرائیلێڤە دهێتە برێڤەبرن لێ ل ژێر پاراستنەکا ئەمریکی.

 

رۆلێ ئەمریکا د ئاڤاکرنا بنگەهێن نهێنی دا ل ئیراقێ چییە؟

چو گۆمان تێدا نینە کو ئەمریکا سیبەرەکا سەربازی و لۆجستی بۆ جهێن ستراتیژی ل ئیراقێ دابین دکەت، چونکی ئەو ب تەمامی کۆنترۆلا ئاسمانێ وەلاتی دکەت و ئاسانکارییان بۆ هەڤپەیمانێن خۆ ژی دکەت. راپۆرتێن نوی ئەمریکا دایە بەر تۆمەتان، پشتی ژێدەرێن ئیراقی دوپاتی ل وێ یەکێ کری کو واشنتۆن پیچەک ئاگەهداری ئێک ژ ڤان هەردو بنگەهان بوویە، یان ژی هەردویان پێکڤە. پەرلەمانتارەکێ ئیراقی کو پشکداری د روینشتنەکا ئەمنی یا نهێنی دا کریە، دبێژیت ئەوا رویدایی سڤکاتیکرنە ب سەروەرییا ئیراقێ. بەرپرسێن ئیراقی ژی واشنتۆنێ تۆمەتبار دکەن کو د دەما شەڕی دا بەغدا نەچارکریە هندەک ژ سیستەمێن خۆ یێن راداری رابوەستینیت، دا کو ئیراق ب تەمامی پشتا خۆ ب هێزێن ئەمریکی گەرم بکەت بۆ چاڤدێریکرنا ئاسمانێ خۆ.

د پێشڤەچوونەکێ دا، ژێدەرێن سەربازی یێن ئیراقی دیارکر کو پشتی ئاگەهدارییا شڤانی، یەکەیەکا ڤەکۆلینێ رەوانەیی ناوچەیێ هاتبوو کرن، لێ کەفتە بەر گولەباران و هێرشێن ئەسمانی ل دەما نێزیکبوونا وی جهی. هێرش بوو ئەگەرێ کوشتنا سەربازەکێ ئیراقی و برینداربوونا دو یێن دی بەری کو هێز پاشڤەبزڤریت.

 

کارڤەدانا ئیراقێ و ئیرانێ:

راپۆرتێن ناڤدەولەتی دەربارەیی دروستکرنا بنگەهێن سەربازی و هەوالگری یێن ئسرائیلێ یێن نهێنی ل بیابانا ئیراقێ - ب تایبەتی ل نێزیک ناوچەیا نوخەیب - قەیرانەکا سەروەرییێ ل ئیراقێ ئینایە رۆژەڤێ. حکومەتێ ل دەستپێکێ هەبوونا هێزێن بیانی رەتکر، لێ پشتی زێدەبوونا تۆرەییا جاددەیێ، نەچاربوو ڤەکۆلینان بکەت. ژ ئالییێ خۆڤە، ئیرانێ ب کارڤەدانەکا دوجارکی بەرسڤ دا؛ ئەوژی ب رێیا ڤەلڤاندنا هێزێن ئەمنی بۆ پێکئینانا شانەیێن نهێنی و ڤەلڤاندنا نوخبەیا سیاسی ب رێیا گەفێن بەرسڤدانێ ل دۆر بۆمبەبارانا ل سەر ئاخا خۆ ژ ڤان بنگەهێن نهێنی یێن ل بیابانا ئیراقێ.

 

کارڤەدانا ئیراقێ

چەندین جاران ئالییێن عەرەبی پەیوەندی ب ئیراقێ کر بۆ راوێژێ دەربارەیی ڤێ بنپێکارییا ئەمنی. فەرماندەییا ئۆپەراسیۆنێن هەڤپشک هەبوونا هەر بنگەهەکێ نەیاسایی رەتکر، لێ ل پەرلەمانی "لیژنەیا ئەمنی و بەرگرییێ" راگەهاند کو ڤەکۆلینێن بلەز دەستپێکرینە و دێ فەرماندەیێن ئەمنی کێشنە بەر لێپرسینێ.

 

مەترسییا سیاسی

حکومەتا ئیراقێ کەفتیە ل ژێر فشارێن سیاسی و جاددەیێ یێن بەرفرەهـ د بەرانبەر دا ئەو وەک بنپێکارییا سەروەرییا خۆ دبینیت، ب تایبەتی پشتی کوشتنا سەربازەکێ ئیراقی د شەڕی دا ل گەل هێزەکا نەنیاس.

 

کارڤەدانا ئیرانێ

ئیرانێ گەفێن بەرسڤدانێ ب رێیێن جودا-جودا کرن؛ ژ وان ڤەشارتنا بنگەهـ و سەکۆیێن مۆشەکی و گوهۆرینا تەکتیکێن سەربازی. هەروەسا سوپایێ پاسدارێن ئیرانێ شانەیێن نهێنی یێن بچویک ل ناڤا ئیراقێ پێکئینان دا کو لڤینێن وان نەهێنە ئاشکراکرن و هێرشێن درۆنی ل دژی بنگەهـ و بەرژەوەندییێن ئەمریکا ل وەلاتێن کەنداڤی ل بیابانێ کرن. تەهرانێ ب فەرمی ب رێیا وەزارەتا دەرڤە هوشداری دا کو ئەو هەبوونا ئسرائیلێ ل ئیراقێ وەک گەفەکا ئێکسەر بۆ سەر ئاسایشا خۆ یا نەتەوەیی دبینیت.

 

ئەرێ ئیراق هێشتا خودانا بریارا خۆیە یان بوویە مێزیا ڤاڤارتنا حساباتان؟

هەبوونا بنگەهێن ئسرائیلێ یێن نهێنی لاوازییا بەغدا د کۆنترۆلکرنا ئاخا خۆ دا نیشان ددەت. پشتەڤانی یان چاڤنقاندنا واشنتۆنێ ل ڤان بنگەهان ئیراقێ دئێخیتە د پێگەهێ پشتگوههاڤێتنێ دا نەکو سەربخۆییێ. ئیران ژی ئیراقێ وەک گۆرەپانا رویبرویبوونا ل گەل ئسرائیلێ دبینیت و ئەڤە ژی دەستوەردانا وێ یا ئێکسەر زێدە دکەت. جاددەیا ئیراقێ یا تۆرەیە و ڤان پێشڤەچوونان وەک سڤکاتی ب سەروەرییێ دبینیت و داخوازا لێپرسینا ل گەل بەرپرسان دکەت. پاشەرۆژا بریارا ئیراقێ ب وێ یەکێڤە یا گرێدایە کو بەغدا چەند دشێت دەسپێشخەرییێ ڤەگەرینیت، ئەگەر نە دێ وەک وەلاتەکێ بارمتە مینیتە ناڤا هەڤرکییێن هندەکێن دی.

ل گۆرەیی بەرپرسێن ئەمنی یێن ئیراقی و هەرێمی، ئارمانج ژ وان بنگەهان کێمکرنا مەودایێ فرۆکەیێن ئسرائیلێ بوویە بۆ گەهشتنا ناڤا ئیرانێ و دابینکرنا خالێن پشتەڤانییا لۆجستی، وەک دابینکرنا سۆتەمەنییێ و پشتەڤانییا ئۆپەراسیۆنێن کۆماندۆ یێن ئسرائیلێ ل ناڤا ئیرانێ. راپۆرتێن رۆژئاڤایی ژی ئاماژەیێ ب بنگەهەکی ل نێزیک کەربەلایێ دکەن، لێ زانیارییێن نوی بەحسێ جهێ دویێ یێ رانەگەهاندی ل بیابانا رۆژئاڤا دکەن.

 

یەکەیا "شلداغ" و ئۆپەراسیۆنێن نهێنی

راپۆرتان بنگەهـ ب یەکەیێ کۆماندۆ یێ ئەسمانی یێ ئسرائیلێ "شلداغ" ڤە گرێدا، کو برێڤەبرنا ئۆپەراسیۆنێن دویر و ل پشت هێلێن دوژمنی دهێتە ناسین. یەکەیا "شلداغ" (یەکەیا 5101) هێزەکا نوخبەیە یا سەر ب هێزا ئەسمانی یا ئسرائیلێیە، ل ناڤا بیابانا ئیراقێ و رۆژهەلاتا ناڤین رۆلەکێ سەرەکی د ئۆپەراسیۆنێن نهێنی دا هەبوویە. پسپۆرێن لەشکەری هۆسا دبینن کو هەبوونا بنگەهەکێ پێشکەفتی ل ناڤا ئیراقێ نیشانا گوهۆرینەکێیە د دەکتۆرینا سەربازی یا ئسرائیلێ دا، کو نوکە کار ل سەر دروستکرنا خالێن جهگیر دکەت بۆ پشتەڤانییا شەڕێن دەم-درێژ، نە بتنێ هێرشێن بلەز.

 

تۆرەبوونا جاددەیێ و پەرلەمانی

تۆرەبوونا جاددەیا ئیراقێ زێدەبوویە، چونکی بنگەهێن ئسرائیلێ وەک سڤکاتییەکا ئێکسەر ب کەرامەتا نەتەوەیی دبینیت. پەرلەمانتار داخوازا ڤەکۆلینێن بلەز و سزادانا وان سەرکردەیێن سەربازی دکەن یێن دەست ل گەل هەیی یان خەمساری کری. ژ ئالییەکێ دیڤە تۆمەت ئاراستەیی ئەمریکا دهێنە کرن کو وەک هەڤپشک یان چاڤێن خۆ ل ڤان چالاکییان دنقینن. ئیران ژی ڤێ تۆرەبوونێ بکاردئینیت بۆ بهێزکرنا هەژموونا خۆ ل ناڤا ئیراقێ، کو ئەڤە سەروەرییا ئیراقێ دئێخیتە د مەترسییێ دا.

 

رۆلێ واشنتۆنێ د ڤەشارتنا چالاکییێن ئسرائیلێ یێن تاوانبارانە دا

هەلویستێ دوالیزمی یێ ئەمریکا بوویە ئەگەرێ دروستکرنا گۆمانێ ل نک ئالییێ عەرەبی و هەرێمی. واشنتۆن ب ئاشکرایی دبێژیت: پشتەڤانییا سەروەرییا ئیراقێ دکەم، لێ ب کردارکی چاڤێن خۆ ل چالاکییێن نەیاسایی یێن ئسرائیلێ دنقینیت. هەبوونا بنگەهێن ئسرائیلێ بێی-ئاگەهداری یان رازیبوونا ئەمریکا نەدبوو. ئەڤ رەفتارە قەیرانا باوەرییێ دناڤبەرا بەغدا و واشنتۆنێ دا زێدە دکەت و هەستێ خیانەتێ ل نک ئیراقییان پەیدا دکەت، چونکی ئیراق دهێتە بکارئینان وەک گۆرەپانا شەڕی بۆ هەڤکرییا ئەمریکا و ئیرانێ ب رێیا ئسرائیلێ.

 

بنگەهەکێ نهێنی یێ دویێ و نهێنییا "چالاکییا ئسرائیلێ" ل بیابانا ئیراقێ چییە؟

 ل گۆرەیی راپۆرتەکا ئەمریکی و رۆژئاڤایی، ئسرائیل بنگەهێ دویێ سەربازی یێ دویێ یێ نهێنی ل بیابانا رۆژئاڤایا ئیراقێ ئاڤاکریە. جهەکێ نەبەرچاڤ ل ناوچەیەکا بێلایەن دناڤبەرا ئیراق و سعوودیێ دا، کو 50 کیلۆمەتران ژ دێرا نوخەیبێ یا دویرە، بوویە بنگەهەکێ پێشکەفتی بۆ ئسرائیلێ د شەڕێ دژی ئیرانێ دا. هەتا نوکە بابەت یێ مژاوییە و تژی نهێنی ل دەردۆرێن ڤی بنگەهی هەنە، گۆتوبێژ ل ئیراقێ د بەردەوامن کا ئەرێ ئەو هێزە ئەمریکی بوون یان ئسرائیلی. هێزا ئەسمانی یا ئسرائیلێ جاددەیەکا دادانا فرۆکەیان ل بنێ دەریاچەیەکا هشکبوویی ل بیابانا نەجەفێ بەری دەستپێکرنا شەڕی دروستکربوو و دهێتە گۆتن کو ئسرائیلێ ئەڤ جهە بۆ دابینکرنا لۆجستی و ڤەحەواندنا یەکەیێن تایبەت بکارئینایە.

بەرپرسێن ئەمنی یێن هەرێمی دبێژن بنگەهێ ئێکێ کو هاتییە دیتن بەری دەستپێکرنا شەڕێ نوکە یێ دناڤبەرا ئەمریکا-ئسرائیل و ئیرانێ دا هەبوویە و د شەڕێ 12 رۆژی یێ دژی تەهرانێ ل خزیرانا 2025ێ دا هاتییە بکارئینان. زانیارییێن شاهدحالان نیشان ددەن کو واشنتۆن ل خزیرانا 2025ێ وەرە پیچەکێ ئاگەهداری هەبوونا ڤان بنگەهان بوویە، ئەڤە رامانا هندێ ددەت کو هەڤپەیمانا سەرەکی یا بەغدا (ئەمریکا) ب مەبەست راستییا هەبوونا هێزێن دوژمن ل ناڤا ئاخا ئیراقێ ژ هەڤپەیمانا خۆ یا ئیراقی ڤەشارتیە.

 

ئەڤ بنگەهە چەوا ل بیابانا ئیراقێ هاتنە ئاڤاکرن؟

پترییا رادارێن ئیراقی ل سالا بۆرى هاتبوونە ژناڤبرن، ئەوژی بوو ئەگەر ئیراق ژ رویێ ئەمنی و عەسکەریڤە یا ئاشکرا بیت و نەشێت لڤینێن ئەسمانی بزانیت. ئەڤە نە نهێنییە کو ئەمریکا ب رەهایی کۆنترۆلا ئاسمانێ ئیراقێ دکەت، گەلەک کەس پرسیار دکەن کا ئەرێ ئاڤاکرنا جهێ نوخەیبێ ب ئاگەهداری و هەماهەنگییا تەمام یا ئەمریکی بوویە یان نە. فەریقێ خانەنشین ماجد ئەلقەیسی ب ئاشکرایی دبێژیت واشنتۆن پابەندبوونێن خۆ یێن پاراستنا سەروەرییا ئیراقێ پشتگوهـهاڤێتن ل سەر حسابا بەرژەوەندییا ئسرائیلێ. دوپاتی هاتەکرن کو ل وی بنگەهێ نهێنی، تیمەکێ تەکنیکی یێ ئسرائیلێ تێدابوویە ب پاراستنا سەربازی یا ئەمریکی، جهێ نوی ب هشیاری ل دۆلەکێ هاتبوو دیارکرن دا کو ژ ئالییێ ئیرانێڤە نەکەڤیتە بەر هێرشان. هەروەسا ئامیرێن رادار و تەشویشێ تێدابوون و هەلیکۆپتەرێن "شینۆک" ل ناوچەیێ دهاتنە دیتن. ل گۆرەیی یاسایا ناڤدەولەتی، ئاڤاکرنا بنگەهێن سەربازی ل سەر ئاخا دەولەتەکا خودان-سەروەری بێی-مۆلەتا وێ قەدەغەیە، پەرلەمانتارێن ئیراقێ داخوازا ڤەکۆلینێ دکەن و ڤێ یەکێ وەک بێ-رێزیییەکێ ب کەرامەتا گەلێ ئیراقێ دبینن.

 

ئیراق دناڤبەرا واشنتۆن و تەهرانێ دا؛ هەڤسەنگییەکا هەرێمی یا لەرزۆک

ئیراق ژبەر پێگەهێ خۆ یێ جۆگرافی ل نیڤا هەڤرکییێیە، ئەڤە ژی دبیتە ئەگەر ئەو ببیتە گۆرەپانەکا ئایدیال بۆ هەڤرکییا هەژموونا ئەمریکا و ئیرانێ. واشنتۆن پشتا خۆ بهەبوونا خۆ یا سەربازی گەرم دکەت بۆ جهگیرکرنا بەرژەوەندییێن خۆ، لێ تووشی رەتکرنا جاددەیا ئیراقێ یا زێدەدبیت. ژ ئالییێ خۆڤە، تەهران پەیوەندییێن ئایینی و سیاسی بکاردئینیت بۆ بهێزکرنا هەبوونا خۆ ل ناڤا سازییێن دەولەتێ. بەغدا بزاڤان دکەت هەڤسەنگییێ دروست بکەت، لێ خۆ دناڤبەرا دو هێزێن شەڕکەر دا دبینیت، ک رەنگە ببیتە ئەگەرێ دروستبوونا شەڕەکێ ب وەکالەت ل سەر ئاخا وی وەلاتی.

 

پاشەرۆژا پەیوەندییێن ئیراق و ئیرائیلێ چییە؟

هۆسا دیارە کو ئەڤە هەڤرکییە بەرەڤ دوژمنکارییەکا هەردەمی دچیت. راپۆرتێن ئەمنی دەربارەیی بنگەهێن نهێنی ئاسایکرن (Normalization) ب تەمامی مەحال کر و هەر هەماهەنگییەکا پاشەرۆژێ دێ بتنێ ب رێیا هەوالگیرییا نەئێکسەر بیت. بنگەهان نیشان دا کا ئسرائیل چەوا دشێت هێرشان بکەتە سەر ئیرانێ کو 1000 میلان یا ژێ دویرە؛ ب رێیا هەبوونا بنگەهێن نێزیک بۆ پشتەڤانییا لۆجستی و تیمێن رزگارکرنێ. بیابانا رۆژئاڤایێ ئیراقێ کو گەلەک یا بەرفرەهـ و کێم-ئاکنجییە، بوویە جهەکێ ئایدیال بۆ ڤان کارێن نهێنی.

 

کاریگەرییا بنگەهان ل سەر سەقامگیرییا هەرێمی

هەبوونا سەربازی یا نهێنی کاریگەرییەکا نەرێنی ل سەر سەروەرییا ئیراقێ هەیە و بریارا نیشتیمانی سنۆردار دکەت. ئەڤ خالێن ل خوارێ کاریگەرییا ڤێ رەوشێ کورت دکەن:

1.  دوالیزما بریارێ: بنگەهێن نەفەرمی درزێ دناڤبەرا حکومەتێ و گرۆپێن چەکدار دا دروست دکەن.

2.  سەقامگیرییا ئابۆری: تێکچوونا ئەمنی رێگرییێ ل رێککەفتنێن ئابۆری یێن مەزن ل گەل کۆمپانییێن ناڤدەولەتی دکەت.

3.  گۆرەپانا شەڕێ ب وەکالەت: هەبوونا نهێنی ئیراقێ دئێخیتە د مەترسییا لێدانا دربێن تۆلڤەکرنێ دا.

4.  گەف ل سەر رێیێن بازرگانی: هەر ئالۆزییەک دێ کاریگەرییێ ل سەر ڤەلڤینا وزەیێ و بازرگانییا هەرێمی دروست کەت.

5.  دوبارە-رێکئێخستنا هەڤپەیمانییان: دبیت وەلاتێن کەنداڤێ بزاڤان بکەن ئیراقێ پتر ب ناڤ سیستەمێ ئەمنی یێ هەڤپشک دا ببەن دا کو رێگرییێ ل بکارئینانا ئاخا ئیراقێ بۆ هەڤکرییان بگرن.

 

د دویماهییێ دا، ئاشکرابوونا بنگەهێن ئسرائیلێ بنپێکارییەکا مەترسیدارە. واشنتۆن د بازنەیێ تۆمەتبارکرنێ دایە و ئیراق د هەڤکێشەکا گەلەک دژوار دا رۆژێن خۆ دبۆرینیت. مەترسییا شەڕێ ب وەکالەت یا زێدە دبیت و ئیران ل هیڤییا دەرفەتەکێیە بۆ بهێزکرنا زێدەتر یا هەژموونا خۆ. ئیراق ل بەرسینگێ ئالنگارییەکا هەبوونی دایە: یان دێ بیتە دەولەتەکا خودان-سەروەری یان ژی دێ وەک گۆرەپانەکا ڤەکری مینیت بۆ هەڤرکییا هێزێن مەزن ل سەر حسابا گەل و خەلکێ خۆ.

ژێدەر: 

● https://www.i24news.tv/ar/%D8%A3%D8%AE%D8%A8%D8%A7%D8%B1/%D8%AA%D8%AD%D9%84%D9%8A%D9%84%D8%A7%D8%AA/artc-9b036230

● https://www.skynewsarabia.com/middle-east/1868605-%D8%B5%D8%AD%D9%8A%D9%81%D8%A9-%D8%A3%D9%85%D9%8A%D8%B1%D9%83%D9%8A%D8%A9-%D8%A5%D8%B3%D8%B1%D8%A7%D8%A6%D9%8A%D9%84-%D8%A3%D9%86%D8%B4%D8%A3%D8%AA-%D9%82%D8%A7%D8%B9%D8%AF%D8%A9-%D8%B9%D8%B3%D9%83%D8%B1%D9%8A%D8%A9-%D8%B3%D8%B1%D9%8A%D8%A9-%D8%A7%D9%84%D8%B9%D8%B1%D8%A7%D9%82

● https://www.dw.com/ar/%D9%82%D8%A7%D8%B9%D8%AF%D8%A9-%D8%B3%D8%B1%D9%8A%D8%A9-%D8%AB%D8%A7%D9%86%D9%8A%D8%A9-%D9%85%D8%A7-%D8%B3%D8%B1-%D8%A7%D9%84%D9%86%D8%B4%D8%A7%D8%B7-%D8%A7%D9%84%D8%A5%D8%B3%D8%B1%D8%A7%D8%A6%D9%8A%D9%84%D9%8A-%D9%81%D9%8A-%D8%B5%D8%AD%D8%B1%D8%A7%D8%A1-%D8%A7%D9%84%D8%B9%D8%B1%D8%A7%D9%82/a-77198872

● https://asharq.com/iran/182383/%D8%A5%D8%B3%D8%B1%D8%A7%D8%A6%D9%8A%D9%84-%D8%A3%D9%82%D8%A7%D9%85%D8%AA-%D9%82%D8%A7%D8%B9%D8%AF%D8%A9-%D8%B9%D8%B3%D9%83%D8%B1%D9%8A%D8%A9-%D8%B3%D8%B1%D9%8A%D8%A9-%D9%81%D9%8A-%D8%A7%D9%84%D8%B9%D8%B1%D8%A7%D9%82-%D9%84%D8%AF%D8%B9%D9%85-%D8%AD%D8%B1%D8%A8-%D8%A5%D9%8A%D8%B1%D8%A7%D9%86/

● https://www.idsc.gov.eg/Article/details/6266