گاڤ

وەزارەتا گەهاندنا ئیراقێ بریاردا حەفت رۆژان ئنتەرنێتێ بێبەرانبەر بدەتە پشکدارێن ئنتەرنێتا کێبلێ (FTTH)، ئەو ژی ب مەبەستا بەرچاڤگرتنا رەوشا دارایی یا وەلاتییان ژبەر گیرۆبوونا مووچەیی.

پێنجشەمبیێ، 6ـێ تەباخا 2026ێ، وەزارەتا گەهاندنا ئیراقێ لیستا 16 کۆمپانییێن دابینکەرێن ئنتەرنێتا کێبلێ (FTTH) و ناڤێ ئەپلیکەیشنێن وان یێن فەرمی بەلاڤکرن، کو پێدڤییە هەتا 7 رۆژێن دی ئنتەرنێتێ بدەنە وەلاتییان بێ کو پارە ژ وان بهێتە وەرگرتن، هەتا وی دەمێ مووچە دهێتە دابەشکرن.

ل گۆرەیی لیستا وەزارەتێ، دیارترین کۆمپانیا و ئەپلیکەیشنێن وان یێن ئەلکترۆنی پێکدهێن ژ: ئەرسلینک، ئای کیو، سوپەرسێل، نوخبەیا ئیراقێ، تەریق سوورەیا، ئیراق سێل، هیلال رافیدەین و سەباح.

وەزارەتا گەهاندنێ ئاماژە ب وێ یەکێ ژی کریە، کو هەر وەلاتییەک رویبروی سەرپێچییا کۆمپانیایان بیت یان پارەیێ زێدە ژێ بهێتە وەرگرتن، دشێت پەیوەندییێ ب هێلا گەرم یا (5019)ـێ بکەت.

ئەڤ بریارا نوی یا وەزارەتا گەهاندنێ د دەمەکی دایە کو ژبەر کێشەیا نەختینەیێ (سیولە)، دابەشکرنا مووچەیێ مەها تیرمەهێ یێ نیڤا فەرمانبەرێن ئیراقێ و هەر سێ سەرۆکاتییێن ئیراقێ (کۆمار، وەزیران و جڤاتا نوینەران) گیرۆبوویە.