گاڤ

ل گۆرەیی ڤەکۆلینەکا نوی یا ئەمریکی، رێنمایێن نوی یێن خۆپاراستن و چاڤدێرییا ساخلەمییا دلی دەرفەتێ ددەتە ملیۆنان کەسان ل سەرانسەری جیهانێ کو خۆ ژ تووشبوون ب جەلتەیا دلی بپارێزن.

د. تایمۆسی ئەندەرسن، ل زانکۆیا پیتسبێرگ ل ئەمریکا، سەرپەرشتێ سەرەکی یێ ڤەکۆلینێ دبێژیت: مەترسییێن ساخلەمییا دلی بۆ دەمێ 10 بۆ 30 سالێن بهێت یێن هاتینە خەملاندن، دەرکەفتییە کو پشکەکا زۆر ژ وان کەسێن بەرێ وەکو "کێم مەترسیدار" دهاتنە پۆلینکرن، نوکە پێدڤی ب چارەسەرییا خۆپارێزییێ هەیە، وەک بکارئینانا دەرمانێ ستاتین بۆ ئینانەخوارا کۆلیسترۆلی.

د. تایمۆسی ئەندەرسن، ئاماژە ب وێ یەکێ دا کو دەستنیشانکرنا نیشانان د ژیەکێ گەنجتر دا دشیاندایە رێژەیا تووشبوون ب نەخۆشییێن شادەمارێن دلی ب رەنگەنێ بەرچاڤ کێم بکەت. نیشانێن بەلاوەخت ژی ئەڤەنە:

● ئێش و گرانییا سینگی

● ئێشانەک کو ژ سینگی بۆ ملی یان دەستێ چەپێ دچیت

● بێهنتەنگی

● گێژبوون و وەستیانەکا زێدەر

ئەندەرسن دوپات دکەت کو ل دەمێ دەرکەفتنا ڤان نیشانان دا، پێدڤییە نەخۆش دەملدەست پەیوەندییێ ب پشکا هەوارهاتنێ بکەت.

رێکخراوا ساخلەمییا جیهانی (WHO) رادگەهینیت، نەخۆشییێن دل و دەماران ئەگەرێن سەرەکی یێن گیانژدەستدانێنە ل جیهانێ، رێکخراو بۆ پاراستنا ساخلەمییا دلی ئاماژەیێ ب چەند رێکێن سەرەکی دکەت، ژ وان ژی "کۆنترۆلکرنا بلندبوونا کۆلیسترۆلی، خوارنا خارنێن ساخلەم و دەستبەرداربوون ژ کێشانا جگارە، ڤەیپ و نەرگیلەیێ."