گاڤ

ڤەکۆلینەکا ڤان دویماهییان کو د کۆڤارا زانستی یا Nutrients دا هاتییە بەلاڤکرن دیار کریە، پەیرەوکرنا سیستەمێ خوارنێ یێ دەریایا ناڤین رەنگە مەترسییا تووشبوونێ ب شەقیقەیا دەمدرێژ ب رەنگەکێ بەرچاڤ کێم بکەت.

ڤەکۆلەران داتایێن 448 نەخۆشێن شەقیقەیێ شیکار کرن و خویێن خوارنێ یێن وان کەسان هەڤبەرکرن یێن کو فۆرمێ هێدی-هێدی یێ نەخۆشییێ ل نک هەبوویە ا گەل وان کەسێن فۆرمێ دەمدرێژ ل نک هەبوویە. ئەنجامان دیارکر کو ئەو پشکدارێن زێدەتر پێگری ب بنەمایێن خوارنا دەریایا ناڤین کری، ئەگەرێ تووشبوونا وان ب شەقیقەیا دەمدرێژ نێزیکی سێ جاران کێمتربوویە. ئەڤ پەیوەندییە تەنانەت پشتی بەرچاڤگرتنا فاکتەرێن وەک ژی (تەمەن)، ڕەگەز، پیڤەرێ گرانییا لەشی (BMI)، هەیاما نەخۆشبیێ، زێدەبکارئینانا دەرمانێن ئێشکشکێن و هویرکاتیێن دی یێن شێوازێ ژیانێ ژی یا بەردەوام بوو.

ژبلی وێ ژی، پێگیربوونا زێدەتر ب خوارنا دەریایا ناڤین پەیوەندی ب کێمبوونا ژمارا رۆژێن سەرئێشێ د مەهەکێ دا هەبوویە، لێ ڤێ پەیوەندییێ گرنگییا خۆ یا ئاماری ژدەستدا پشتی بەرچاڤوەرگرتنا فاکتەرێن دی یێن خوارنێ، د دەمەکی دا کاریگەرییا کێمکرنا مەترسییا تووشبوونێ ب سەرئێشا دەمدرێژ یا بەردەوام بوو. هەروەسا زانایان چو پەیوەندییەکا رۆهن دناڤبەرا توندییا شەقیقەیێ و ڤەخوارنا ئاڤێ، ڤەخوارنێن گازی یێن شرینکری، یان کافاینێ دا نەدیتینە.

ڤەکۆلەر تەکەزییێ دکەن کو پەیرەوکرنا رێجیمەکا کوالێتی-بلند رەنگە فاکتەرەکێ گرنگ بیت کو پەیوەندی ب کێمبوونا مەترسییا تووشبوونێ ب نەخۆشییێن دەمدرێژڤە هەیە، هەروەسا داخوازا ڤەکۆلینێن نۆشداری یێن زێدەتر د پاشەرۆژێ دا کریە بۆ پشتراستکرنا ڤێ پەیوەندییێ.

ژ ئالییەکێ دیڤە، ڤەکۆلینەکا دی یا هەمان کۆڤارێ دیارکریە؛ پەیرەوکرنا سیستەمێ خوارنا دەریایا ناڤین، خوارنا DASH و خوارنا کوالێتی-بلند یا کو ل سەر بنەمایێ روەکی هاتییە ئاڤاکرن، مەترسییا تووشبوونێ ب هندەک جۆرێن پەنجەشێرێ ل نک ژنان کێم دکەت.

سیستەمێ خوارنێ یێ دەریایا ناڤین شێوازەکێ خوارنێ یێ ساخلەمە کو پشتا خۆ ب کەسکاتی، فێقی، دان و دکاک، چەرەزات و زەیتا زەیتوونێ گرێددەت، ل گەل خوارنا ماسییان و کێمکرنا گۆشتێ سۆر و بەرهەمێن نەساخلەم یێن شیری.