رەمزی سیسۆ، چاڤدێرێ سیاسی

ئەڤرۆ ئیراق هێدی هێدی بەرەڤ رەوشەکا نە سەقامگیر ڤە دچیت و دچیتە ناڤ قویناغەکا هەستیار دا و ئەگەرێ سەرەکی یێ ڤێ ئالۆزییێ ژی بریارا دویماهییێ یا سەرۆكوەزیرێ ئیراقێ عەلی زەیدی یە، کو بریار دایە گرۆپێن چەکدار، بتایبەتی حەشدا شەعبی، ژ چەک بکەت و بێخیتە د ناڤ سوپایێ فەرمی دا.

ئەڤ بریارە وەکی ئاگرەکی بوو کەفتە ناڤخۆیا ئیراقێ و دووبەرەکییەکا مەزن ئێخستە ناڤ مالا شیعەیان. هەتا نوکە حەشدا شەعبی ب فەرمی ملکەچێ وێ بریارێ نەبوویە و ب ئاشکرا دبێژن "ئەم ل ژێر فەرمانا سەرۆکوەزیران نینین". ئەڤە ب خۆ دبیتە واتەیا شکەستنا دەستهەلاتا دەولەتێ.

بەلگەیێن سیاسی دبێژن ئەڤ پێنگاڤا زەیدی ب هەماهەنگییەکا بەرفرەهـ ل گەل ئەمریکا و ئسرائیل و سعوودیێ هاتییە هاڤێتن، ب مەرەما زێدەتر دۆرپێچکرنا ئیرانێ و رزگارکرنا ئیراقێ ژ بن دەستێ وێ و قوتکرنا دەستێ وێ ژ ئابۆری و ئەمنیەتا ئیراقێ.

لێ راستیەکا تەحەل و مێژۆیی یا هەی کو نابیت ژبیر بکەین، پشتی کەفتنا رژێما بەعس ل سالا 2003، بۆ ماوێ 23 سالان ئیرانێ ب پلانەکا درێژخایەن هەمی ئامادەکاری کرینە و تۆرەکا بهێز ژ گرۆپێن لایەنگرێن خۆ، سیاسی و سەربازی و ئابۆری، ل ناڤ ئیراقێ ئاڤا کرینە. ئیران ل ئیراقێ بتنێ میلیشیا نینە، بەلکو دەولەتەکا دناڤ دەولەتێ دا ئاڤا کرییە. ژبەر وێ چەندێ ئەڤرۆ گرۆپێن چەکدار ژ حکومەتا بەغدا ب خۆ بهێزتر و پارەدارتر و رێکخستیتـرن.

د ڤێ رەوشا هەستیار دا، پرسیارا سەرەکی و چارەنڤیسی ئەوە، ستراتیژیەتا هەرێما کوردستانێ دڤێت چ بیت؟

ب بۆچوونا من، نابیت هەرێم ببیتە بەشەك ژ ڤی شەری. دڤێت حکومەتا هەرێمێ سێ خالێن گرنگ بەرچاڤ وەرگریت.

ئێکەم خال: بێلایەنییا چالاک

گرنگیەکا زێدەتر بدەتە پەیوەندییێن خۆ یێن نێڤدەولەتی و خۆ دویر بێخیت ژ شەرێ مالا شیعا. پەیوەندییان ل گەل واشنتن و تەهران و ئەنقەرە و ریازێ ب هەڤسەنگی بهێلین. هەرێم دڤێت ببیتە فاکتەرێ ئارامییێ، نەکو بەشەك ژ هەڤپەیمانییا کەسێ.

دووەم خال: ئێکرێزییا ناڤخۆ

دڤێت ب زویترین دەم پەرلەمانێ کوردستانێ بهێتە کاراکرن و حکومەتا نوی د دەمەکێ کورت دا بهێتە پێکئینان. ئیراق ئەگەر بەرەڤ شەرێ ناڤخۆ بچیت، هەرێم نابیت بێ حکومەت و دو ئیدارە بیت. دووبەرەکییا پارتی و ئێکەتییێ یان هەر لایەنەکێ دیتر دێ بیتە خالا لاوازییا مە و دێ دەرفەتێ دەتە دوژمنێن کوردستانێ.

سێیەم خال: ئامادەکارییا ئەمنی و ئابۆری

سەرکردایەتییا کوردستانێ دڤێت بۆ هەمی ئەگەران ئامادە بیت. گرۆپێن چەکدار گەفان ل سەرۆکوەزیران دکەن و ئیراق دێ تووشی مەزنترین قەیرانا ئەمنی و ئابۆری بیت. دڤێت پێشمەرگە ل سەر سنۆرێن کەرکووك و میسل و خانەقینێ ئامادە بیت، ژبەرکو داعش و گرۆپێن تێکدەر دێ بزاڤان کەن ڤێ ڤالاهییێ بکاربینن. ژ رویێ ئابۆری ژی دڤێت هەرێم خەزینەکا تایبەت هەبیت بۆ ئەگەرێ راگرتنا مووچە و بۆدجەیا ئیراقێ.

دبینن رەوش بەرەڤ ئالۆزییێ دچیت و پرسیار ل ڤێرە ئەوە: ئەرێ ئیراق دێ بیتە قوربانییا ناکۆکییێن دەستێ ئەمریکا و ئیرانێ پشتی 30ێ ئیلۆنێ؟

بەرسڤەکا کورت و پۆخت، دێ ب خۆ رویدانێن چەند رۆژێن بهێت دیار کەن، کا گرۆپێن چەکدار دێ ملکەچ بن یان ئیراق دێ چیتە ناڤ ئاگرەکی دی یێ کو دەرکەفتن ژێ ب ساناهی نابیت. ئەوێ دێ بەرسڤێ دەت، نە لێدوانە، بەلکو ئەردە .