گاڤ

گەنجەک د رویبارێ خابویری دا ل نێزیک گوندێ چەمسیرمۆ ل سنۆرێ ئیدارەیا سەربخۆ یا زاخۆ خەندقی، ژ دەستپێکا ئەڤسالە ژی وەرە هەتا نوکە 57 کەس د ئاڤێن هەرێما کوردستانێ دا خەندقینە.

ل گۆرەیی زانیارییێن پەیامنێرێ گاڤ، نۆح سلێمان، ناڤێ وی ئەحمەد عەبدولباقی محەمەدە و ژییێ 22 سال بووینە و خەلکێ زاخۆیە، ژبەر نەزانینا مەلەڤانییان خەندقیە و تەرمێ وی ژ ئالییێ تیمێن بەرەڤانییا باژێریڤە هاتیە دەرخستن و رەوانەیی نۆشدارییا داد هاتییە کرن.

ئامارێن خەندقینێ ل سنۆرێ زاخۆ:

● ژ دەستپێکا ئەڤسالە وەرە 11 حالەتێن خەندقینێ هاتینە تۆمارکرن.

● ژ دەستپێکا ئەڤسالە وەرە 18 کەس ژی ژ خەندقینێ هاتینە قورتالکرن.

● رۆژا ئەینییا بۆری ژی دو کەس د زییێ مەزن دا و ل شێلادزێ ژی کەسەکێ دی خەندقی بوون.

ل گۆرەیی ئاماران، ژ دەستپێکا ئەڤسالە وەرە هەتا نوکە 11 حالەتێن خەندقینێ ل سنۆرێ ئیدارەیا سەربخۆ یا زاخۆ هاتینە تۆمارکرن و 18 کەس ژی ژ خەندقینێ هاتینە رزگارکرن. رۆژا ئەینییا بۆری، ل زێیێ مەزن دو گەشتیارێن عەرەب و ل شێلادزێ ژی گەشتیارەکێ عەرەب خەندقی، ب ڤێ یەکێ ژی هژمارا وان کەسێن ژ دەستپێکا ئەڤسالە وەرە ل سنۆرێ پارێزگەها هەولێرێ خەندقین بۆ 19 کەسان بلندبوو.

ئامارێن خەندقینێ ژ دەستپێکا ئەڤسالە وەرە ل ئاڤێن هەرێما کوردستانێ

ژ دەستپێکا ئەڤسالە وەرە هەتا نوکە 57 کەس د ئاڤێن هەرێما کوردستانێ دا خەندقینە، ئەگەرێ سەرەکی یێ پترییا رویدانان ژی بۆ بنپێکرنا رێنمایان و مەلەڤانیکرنێ ل وان جهـ و دەڤەران ڤەدگەریت ئەوێن تابلۆیێن قەدەغەکرنێ لێ هاتینە دانان.