گاڤ

دەستەیا کارگێری یا یانەیا وەرزشی یا سێمێل د راگەهاندنەکا فەرمی دا هوشداری دا کو ئەگەر رەوشا وان یا دارایی ب ڤی رەنگی بمینیت، پشکدارییێ د وەرزێ بهێت یێ خۆلا نایاب یا کوردستانێ دا ناکەن.

ل گۆرەی راگەهاندنا یانەیێ کو ئەڤرۆ سێشەمبییێ 25ێ تەباخا 2026ێ، بەلاڤکرییە، پشتی 14 سالێن دویرکەفتنێ و د دەمەکی دا کو شیان دەربازی خۆلا نایاب ببن، نوکە یانە کەفتییە ل ژێر بارێ قەرەکێ مەزن.

یانە ئاشکرا دکەت کو ئەڤ قەرە "ل سەر بنەمایێ هندەک سۆزێن ئالییێن پەیوەندیدار هاتبوونە کرن کو دێ هێنە دان، لێ هەتا نوکە چو گاڤێن کردارکی بۆ چارەکرنا وان قەران نەهاتینە هاڤێتن، ئەڤ چەندە ژی بوویە رێگرەکێ مەزن ل هەمبەر کارێن کارگێرییێ."

یانەیا سێمێل دیار ژی کریە کو "بتنێ نێزیکی دو مەهان بۆ دەستپێکرنا خۆلا نایاب ماینە، د دەمەکی دا کو پێدڤی بوو تیما وان ب تەمامی بەرهەڤ ببا و گرێبەستێن نوی ل گەل یاریزانان هاتبانە ئیمزاکرن، ژبەر نەبوونا پارەیی نەشیاینە چو گرێبەست و ڤەگوهاستنان بکەن و تیما خۆ بهێزبئێخن."

د پشکەکا دی یا راگەهاندنێ دا هاتییە: "یا ژ هەمییێ دلگرانتر ئەوە کو یاریگەها نوکە یا یانەیێ ب تەمامی ژکارکەفتییە و کارێن تەمامکرنا یاریگەها نوی ژی راوەستیاینە. ب ڤێ رەوشێ یانەیا سێمێل ژ مافێ مێهڤانداریکرنا یارییان ل سەر ئەردێ خۆ بێبەهر دبیت، کو ئەڤە ژی زیانەکا مەزنە بۆ جەماوەرێ مە."

ل دویماهییێ، کارگێرییا یانەیێ دوپات دکەت "کو وان هەمی ئالییێن پەیوەندیدار ژ ڤێ رەوشا بەرتەنگ و هەستیار ئاگەهدار کرینە، لێ هەمی ل سەر ڤی بابەتی بێدەنگ بووینە؛ لەوما هوشداریێ ددەن ئەگەر چو چارەسەری نەهێنە دیتن، یانەیا سێمێل پشکدارییێ د خۆلا نایاب یا کوردستانێ دا ناکەت."