گاڤ

بەنکا ناڤەندی یا ئیراقێ ئەو نووچە رەتکرن یێن بەحس ل چاپکرنا جۆرەکێ نوی یێ پارەیی و لادانا سفران دکەن و راگەهاند، هەر بریارەکا ب وی رەنگی، پێدڤی ب رێکارێن یاسایی و دەمەکێ درێژ هەیە.

رۆژا چارشەمبییێ 26ـێ تەباخا 2026ێ، بەنکا ناڤەندییا ئیراقێ د راگەهاندنەکێ دا بەرسڤا وان دەنگۆیان دا، یێن کو دەربارەی چاپکرنا دراڤەکێ نوی و لادانا سفرێن ل سەر دیناری هاتینە بەلاڤکرن.

بەنکا ناڤەندی یا ئیراقێ دبێژیت: "ئەڤ نووچەیە پشتبەستنێ ل سەر چو ژێدەرێن فەرمی ناکەن و بەنکا مە چو دراڤەکێ نوی ب لادانا سفران چاپنەکریە."

بەنکا ناڤەندی یا ئیراقێ ئاماژە ب وێ یەکێ ژی دایە، هەر پرۆژەیەکێ بهێت بۆ رێکخستنا جۆرێن دراڤی یان لادانا سفران -ئەگەر بریار ل سەر بهێتە دان- پێدڤی ب چەندین قویناغێن یاسایی، رێکخستن و تەکنیکی هەیە. هەروەسا دبێژیت: ئەگەر بریارەکا ب وی رەنگی بهێتە دان، دەمەکێ گونجایی دێ هێتە دیارکرن دا کو وەلاتی و بەنک بشێن ب رەنگەکێ رێکوپێک و ئارام پارەیێ کەڤن بگوهۆرن، ژ پێخەمەت هندێ مافێ دارایی یێ چو کەسان ژدەستنەچیت.

بەنکا ناڤەندی یا ئیراقێ داخواز ژ وەلاتییان و میدیایێ کر، ب تنێ پشتبەستنێ ل سەر زانیارییێن وان یێن فەرمی بکەن و ژ بەلاڤکرنا نووچەیێن پشتراستنەکری دویربکەڤن، ژبەر کو ئەڤ جۆرە دەنگۆیە دبنە ئەگەرێ تێکچوونا بازاری و گەهاندنا زیانێ ب بەرژەوەندییێن دارایی یێن خەلکی.