گاڤ

سەرۆکاتییا پەرلەمانێ ئیراقێ رەزامەندی دا، نڤیسینگەهەک ل قەزا ئاکرێ ل سنۆرێ پارێزگەها دهۆکێ بهێتە ڤەکرن.

نڤیسارا رەزامەندییا سەرۆکاتییا پەرلەمانێ ئیراقێ بۆ ڤەکرنا وێ نڤیسینگەهێ، چارشەمبییێ 26ـێ تەباخا 2026ێ، ژ ئالییێ سەفوان گەرگەری، ئەمینداری گشتی یێ پەرلەمانێ ئیراقێڤە هاتییە دەرخستن.

سەلوان ئاکرەیی، ئەندامێ پەرلەمانێ ئیراقێ کو ژ پشکا وێ قەزایێیە، بۆ گاڤ راگەهاند، بزاڤێن ڤەکرنا وێ نڤیسینگەهێ بۆ وێ یەکێ بوون کو وەلاتییێن دەڤەرێ ئەگەر کێشەیەک هەبایە نەچاردبوون بچنە نڤیسینگەها دهۆکێ یا پەرلەمانێ ئیراقێ، ژبلی هندێ ژی ژمارەیەکا وەلاتییێن دەڤەرێن ماددەیێ 140 یێن باشیک و بەرتللە ل ئاکرێ نە، کو بۆ کارێن خۆ پێدڤی ب حکومەتا فیدرال و پەرلەمانی دبن.

ژ 12 ئەندامێن پەرلەمانی ل سنۆرێ بازنەیا پارێزگەها دهۆکێ، دو ژ وان خەلکێ ئاکرێ نە، ئەو ژی سەلوان ئاکرەیی و زیرەک زێباری نە.

سەلوان ئاکرەیی راگەهاند ژی، پێشبینی دکەن هەتا مەهەکا دی نڤیسینگەها پەرلەمانی ل ئاکرێ ب فەرمی بهێتە ڤەکرن.