گاڤ

رێڤەبەرییا گشتی یا حەج و عومرەیێ ل هەرێما کوردستانێ هوشدارییێ ددەتە وەلاتییان و رادگەهینیت؛ شاشی د فۆرمێن زێدەتر ژ 1600 کەسان دا هەیە یێن ناڤێ خۆ تۆمارکری و ئەگەر د چەند رۆژێن بهێت دا زانیارییێن خۆ راستڤەنەکەن، دێ ژ تیروپشکا حەجێ هێنە دویرئێخستن.

پێنجشەمبییێ، 27ێ تەباخا 2026ێ، کاروان ستوونی، پەیڤدارێ رێڤەبەرییا گشتی یا حەج و عومرەیێ ل هەرێما کوردستانێ راگەهاند: "وان وەلاتییان ئاگەهدار دکەین یێن ئەڤسالە ناڤێ خۆ بۆ پرۆسەیا حەجێ نڤیسی، نامە بۆ زێدەتر ژ 1600 کەسان هاتییە هنارتن دا کو کێماسی و شاشیێن د فۆرمێن خۆ دا راستڤەبکەن، لێ هەتا نوکە نامە ڤەنەکرینە و چو گوهۆرین نەکرینە."

کاروان ستوونی گۆت ژی: "داخوازێ ژ هەمی وەلاتییان دکەین کو ب رێیا ئەکاونتێن خۆ یان هژمارا (KRDPass)  بەرێ خۆ بدەنە فۆرمێن خۆ، دا کو بزانن کا نامە بۆ چوویە یان نە."

پەیڤدارێ حەج و عومرەیێ دوپاتکر: "هەر کەسەکێ نامە بۆ چووبیت و د چەند رۆژێن بهێت دا گوهۆرینان د فۆرما خۆ دا نەکەت، ناڤێ وی ناچیتە د تیروپشکێ دا، لەوما گرنگە ئەو کەسێن فۆرم پێشکێشکرین، ب رێیا ئۆنلاین پێداچوونێ د ناڤێن خۆ دا بکەن دا کو پشتراست ببن چو کێماسی د فۆرمێن وان دا نینن."

ناڤنڤیسین بۆ حەجێ ئەڤ سالە ل 21ی تیرمەهێ دەستپێکر. پار ناڤنڤیسین بۆ حەجێ ل 11ێ ئیلۆنێ دەستپێکربوو و ل 26ی هەمان مەھ ب دویماهی هاتبوو. پتر ژ 90 هزار کەسان داخوازییا خۆ ب رێیا فۆرما ئەلکترۆنی پرکربوو، ژ وێ هژمارێ 5120 کەسان ب تیروپشکێ ناڤێن وان دەرکەفت.

ئەڤ سالە ل 7ی گولانێ ئێکەم گەشتا حەجییان ژ هەرێما کوردستانێ بۆ رێورەسمێن حەجێ دەستپێکر و دویماهی گەشت ل 17ی گولانێ بوو.