گاڤ

لیۆنێل مێسی، ئەفسانەیێ تەپاپێ یێ ئەرجەنتینێ و جیهانێ، پشتی نێزیکی 20 سالان ژ ل بەرکرنا درێسێ هەلبژارتییێ نیشتیمانی یێ وەلاتێ خۆ، ب فەرمی دەستبەرداربوونا خۆ ژ یاریکرنا ناڤدەولەتی راگەهاند.

د بەیاننامەیەکا فەرمی دا کو ئەڤرۆ بەلاڤکریە، مێسی دیارکریە کو بریارا دەستبەرداربوونێ پشتی هزرکرنەکا کویر و دەم-درێژ هاتیە، ئاماژە ب وێ چەندێ ژی کریە کو هەرچەندە ئەڤ بریارە بۆ وی یا ب ئێش و نەخۆشە و هەتا نوکە ژی د ناخێ خۆ دا کارتێکرن لێ کریە، لێ گەهشتییە وێ باوەرییێ کو نوکە دەمێ گونجایە بۆ وێ چەندێ کو دویماهییێ ب کاروانێ خۆ یێ ناڤدەولەتی بئینیت.

کاپتنێ تانگۆ تەکەزی ل سەر وێ چەندێ کریە کو د هەیاما هەمی وان سالێن دەربازبوویی دا، هەمی شیانێن خۆ بۆ خزمەتا نیشتیمانێ خۆ و درێسێ ئەرجەنتینێ تەرخان کرینە، نەکو بتنێ د ڤان سالێن دویماهییێ دا کو هەمی ناسناڤ ل گەل هەلبژارتی بدەستڤەئینان، بەلکو د هەمی قویناغان دا خەبات و تێکۆشان کریە.

مێسی د پەیاما خۆ دا دبێژیت: "من هەردەم شەڕ کریە دا کو خەلک دلخۆش بن و ب رێیا تەپاپێ شانازیێی ب ئەرجەنتینیبوونا خۆ ببەن، لێ دەمەکێ کێم مایە و هندەک پشکێن ڤێ چیرۆکێ بەر ب دویماهییێ دچن".

ئاماژە ب وێ چەندێ ژی کریە: "من هەمی تشت پێشکێشکرن و ئێدی چو تشت ل دەف من نەمایە بدەم، لەوما ئەز هۆسا دبینم کو دەمێ وێ چەندێ هاتیە رێکێ بۆ یاریزانێن گەنج چۆل بکەم ئەوێن کو ژ هەژی ڤێ دەلیڤەیێ".

ئەفسانەیێ مەزن یێ ئەرجەنتینێ سوپاسییەکا بێسنۆر ئاراستەیی پشتەڤانان کر بۆ وان 20 سالێن پشتەڤانییا وی کری و راگەهاند کو هەرچەندە ئەو دێ بیرییا دەنگێ وان دناڤ یاریگەهێ دا کەت، لێ ژ ڤێرە و وێڤە وەک پشتەڤانەک ل دەرڤەیی یاریگەهێ دێ مینیت و د دەمێن خۆش و نەخۆش دا دێ پشتا وان گریت. هەروەسا سوپاسییا خێزانا خۆ، راهێنەر، هەڤالێن خۆ و هەمی وان کەسان کر یێن کو د ڤی کاروانی دا ل گەل وی بووین.

مێسی ئەڤ چەندە ژی ئاشکرا کر کو ئەڤ بەیاننامەیە ل 21ـێ مەها 7 نڤیسیبوو، رامانا وێ بتنێ دو رۆژان پشتی یارییا دویماهییێ یا مۆندیالێ بوو، لێ ئەو رویدانێن ل ڤان دویماهیان ب سەرێ بابێ وی هاتین، زێدەتر ئەو ژ بریارا خۆ پشتراستکر.

ل دویماهییێ مێسی ب هەستکرن ب شانازی و ئارامییێ مالئاڤاهی ل هەلبژارتییێ وەلاتێ خۆ کر و پەیاما خۆ ب ڤێ رستەیێ ب دویماهی ئینا: "سوپاس بۆ خودێ کو ئەز وەک ئەرجەنتینی دروستکریمە.. ڤامۆس ئەرجەنتینا".