گاڤ

پەیڤدارێ سوپایێ ئیرانێ رادگەهینیت؛ بێگۆمان ب زویترین دەم دێ تۆلا خۆ ژ شەڕانگێزییا دوژمنی ڤەکەن، کو ئەڤ بەرسڤە دێ یا بلەز، وێرانکەر و بەرفرەهـ بیت. د هەمان دەمدا رێبەرێ بلند یێ ئیرانێ موجتەبا خامنەیی تەکەزێ ل سەر هندێ دکەت کو گەلێ هێژا یێ ئیرانێ و بەرەیێ موقاوەمەیێ دێ وانەکا باش فێری ئەمریکا کەن.

ئەڤ هوشداری و پەیامێن توند د دەمەکیدا دهێن کو پێشتر سەرۆکێ ئەمریکا دۆنالد ترەمپ راگەهاندبوو، هێزێن وەلاتێ وی دەست ب وەشاندنا گورزێن مەزن ل ئارمانجێن ئیرانێ ل نێزیک دەرتەنگا هورمز کرییە.

محەمەد ئەکرەمینییا، پەیڤدارێ سوپایێ ئیرانێ ئاشکرا کر؛ چو بنپێکاری ل سەر سەروەرییا ئاخا وەلاتی بێی بەرسڤ نامینن، لەورا هێزێن چەکدار یێن ئیرانێ بۆ داڕشتنا بەرسڤەکا لەشکری یا توند بەرهەڤن کو هەمی پیڤەرێن سەربازی دەربازبکەت. ژ لایێ خۆ ڤە ژی.

رێبەرێ بلند یێ ئیرانێ موجتەبا خامنەیی پشتی هێرشێن ئەمریکا د پەیامەکێدا ڕاگەهاند کو لایەنێ ئەمریکی دێ باجەکا مەزن دەت چونکی هێزێن بەرەیێ موقاوەمەیێ دێ ل هەمبەر ڤان دەستدرێژییان راوەستن.

ئەڤ ئالۆزییێن بەردەوام د ناڤبەرا واشنتۆن و تەهرانێ دا پشتی هندێ دهێن کو سوپایێ ئەمریکا (سێنتکۆم) چەند بنکەیێن سوپایێ پاسداران ل دەڤەرێن سنۆری ئارمانجکربوون، کو د ئەنجامدا دەنگێ پتر ژ هەشت تەقینان ژ دەوروبەرێن گوندێ مسن، ل گزیرتەیا قشم و چەندین تەقینان ل باژێرێن بەندەر-عەباس، سیریک و کونارەک هاتبوو بهیستن. ترەمپی ژی راگەهاندبوو کو ئەڤ هێرشە تۆلڤەکرنەکە د بەرامبەر بزاڤێن چاندنا مینێن دەریایی د دەرتەنگا هورمز دا، و هوشداری دابوو ئەگەر تەهران تۆلا ڤان هێرشان ڤەکەت، دێ رویبروی هێرشەکا بلندتر بیت کو دبیت دەولەتا ئیرانێ نەمینیت.