گاڤ

سەرۆک بارزانی بۆ وەغەرا دویماهییێ یا پ. د. عەبدولفەتاح بۆتانی، نڤیسەر و ئەکادیمیست، سەرەخۆشی ئاراستەیی مالباتا وان کر و خۆ ب هەڤپشکێ خەما وان دزانیت.

سێشەمبییێ 1ێ ئیلۆنا 2026ێ، سەرۆک مەسعوود بارزانی، بۆ وەغەرا دویماهییێ یا پ. د. عەبدولفەتاح بۆتانی، نڤیسەر، ئەکادیمیست، دیرۆکنڤیسێ کورد و سەرۆکێ بەرێ یێ ئەکادیمییا کوردی، پەیامەکا هەڤخەمییێ بەلاڤکر.

د پەیاما سەرۆک بارزانی دا هاتییە: "سەرەخۆشییێن خۆ ئاراستەیی مالبات، کەسوکار و دۆستێن خودێ ژێ ۆازی دکتۆر عەبدولفەتاح بۆتانی و هەمی نڤیسەر و رەوشەنبیرێن کوردستانێ و ئەکادیمییا کوردی دکەم و خۆ ب هەڤپشکێ خەما وان دزانم."

سەرۆک بارزانی دبێژیت: "ژ خودایێ مەزن هیڤیخوازم روحا خودێ ژێ رازی ب بەهەشتا بەرین شاد بکەت و سەبر و هەدارێ بدەتە هەمی ئالییان."

پ. د. عەبدولفەتاح عەلی بۆتانی کییە؟

ناڤبرى ژ مالباتەکا كوردپه‌رور، خزمه‌تكار، بابو مام و برا، هه‌مى ره‌وشه‌نبیر و ناڤداربوون، ئه‌و ب خۆ ژى گه‌نجینه‌یه‌كا دیرۆكا نوى و هه‌ڤچه‌رخ یا كوردى بوو، گه‌له‌ک خزمه‌تا دیرۆكا ده‌ڤه‌را به‌هدینان كریه‌ و په‌رتووكێن وى ل سه‌ر ڤێ چه‌ندێ دیدەڤانن.

● ل گوندێ گرده‌پان سالا 1949ێ هاتييه‌ سه‌ر دنيايێ. ژ مالباته‌كا ئايينداره‌، باب و باپير مه‌لا بووينه‌.

● ل سالا 1952ێ چووينە باژێرێ مويسل، هەمی قویناغێن خواندنێ ل وێرێ تەمامکرينه‌.

● ل 21ی نیسانا 1973ێ نڤيسين دەستپێکر و ئێكه‌م گۆتارا وى دەربارەیی ديرۆكا بەهدینان بوو.

● ل رۆژنامەیا (التأخي) سالێن 1972-1973ێ كاركريه‌. ژبه‌ر كاودانێن سیاسی و ئاكنجيبوونا وان ل مويسل ب ناڤێ خۆ و ناسناڤان گۆتار به‌لاڤکرینە.

● ل سالا 1972ێ، بڕوانامه‌ بكالۆريس ئاداب ل زانكۆيا مويسل د بوارێ مێژوويێ دا ب پلا ئێكێ ب ده‌ستڤه‌ ئينايه‌.

● ل سالا 1973ێ، بڕواناما دبلۆما بلند ژ زانكۆيا به‌غدا- كۆليژا په‌روه‌رده‌ ب پلا دويێ بده‌ستڤه‌ =ئينايه.

● ل 26/11/1974 وەک مامۆستا ل بەردەرەش، ناڤەندا ناحیا (العشائر السبعة)، نوكه‌ قەزا بەردەرەش هاتييە دامه‌زراندن.

● ل سالا 1978ێ بۆ مويسل هاته‌ ڤه‌گوهاستن.

● ل سالێن 1990-1995ێ ل زانكۆيا مويسل ب نمرەیا باش باوەرنامەیا ماستەر و دکتۆرایێ وەرگرتيه.

● ل 1/10/1995ێ هاتييه‌ زانکۆیا دهۆکێ، ل 1/10/1996ێ وەک عەمیدێ کۆلیژا ئاداب و پاشى وەک عەمیدێ ناڤەندا ڤه‌کۆلینێن کوردی ل زانکۆیا دهۆکێ هاته‌ دانان.

● وەک سەرۆکێ ئەکادیمییا کوردی ل هەولێرێ بۆ دو خۆلان هاتييە هەلبژارتن.

● ل 7/3/2024ێ، پشتى خزمه‌تا (51) سال و چه‌ند هه‌يڤان هاتييه‌ خانەنشینكرن.

● ل 23/11/2024ێ پەرتووکخانەیا بۆتانى ڤه‌كر، كو ژ چه‌ند پشكان پێکدهێت و په‌رتووكخانا وى يا تایبەت ژى تێدایە.

● هه‌تا نوكه‌ پتر (45) په‌رتووكان چاپكرينه‌، هەمى ل سەر ديرۆكا کورد و کوردستانێ نه‌، هنده‌ک بۆ زمانێ كوردى هاتينه‌ وه‌رگێران.