گاڤ

وەزارەتا ناڤخۆ یا هەرێما کوردستانێ راگەهاند، 33 گەنجێن دی یێن کورد ژ لیبیا دێ هێنە ڤەگەراندن بۆ هەرێما کوردستانێ. هەروەسا گۆت ژی کو هەتا نوکە شیانە پتر ژ 300 گەنجان ژ لیبیا ڤەگەرینن.

چارشەمبی، 2ـی ئیلۆنا 2026ێ، وەزارەتا ناڤخۆ یا هەرێما کوردستانێ د راگەهاندنەکێ دا بەلاڤکر، پشتی کو نووچەیێ بەرزەبوونا کۆمەکا وەلاتییان ل لیبیا گەهشتیە حکومەتێ، مەسروور بارزانی هەردو وەزارەتا ناڤخۆ و فەرمانگەها پەیوەندییێن دەرڤە راستپاردن کو بلەز رێکارێن پێدڤی بگرنەبەر بۆ دیتنا وان، رزگارکرن و ڤەگەراندنا وان.

ل گۆرەیی راگەهاندنێ، هەمی مامەلەیێن یاسایی یێن وان 33 وەلاتییان ب دویماهی هاتینە و بریارە حەفتییا بهێت بگەهنە بۆ هەرێما کوردستانێ.

وەزارەتا ناڤخۆ ئاماژە ب رەوشا دژوار یا وان گەنجان کریە و راگەهاندیە، هندەک ژ وان بۆ هەیاما هەشت هەیڤان د زیندانێن لیبیادا بوون و د وی دەمی دا بەردەوام رویبروی مەترسییا مرنێ بووینە.

حکومەتا هەرێما کوردستانێ جارەکا دی هوشداری دا گەنجان و مالباتێن وان و بەحسێ گرنگییا خۆپاراستنێ ژ کۆچبەرییا نەیاسایی کر. د راگەهاندنێ دا هاتیە: "ئەڤ جۆرێ کۆچبەریێ نە تنێ مەترسییێ ل سەر ژیانا وان دروست دکەت، بەلکو دبیتە ئەگەرێ بنپێکرنا یاسایێن وەلاتێن دی و لێپرسینا توند یا یاسایی ب دویڤ خۆ دا دئینیت."

وەزارەتا ناڤخۆ راگەهاند، حوکمەتا هەرێما کوردستانێ شیایە 302 کۆچبەرێن نەیاسایی د رەوشێن جودا-جودا دا رزگار بکەت و ڤەگەرینیتە هەرێما کوردستانێ. د چەند رۆژێن بهێن ژی دا ئەو 33 کۆچبەرێن دی دێ گەهنە ناڤ مالباتێن خۆ.