گاڤ

رێڤەبەرییا گشتی یا هاتنوچوونا هەرێما کوردستانێ د رۆهنکرنەکێ دا هوشداری دا وەلاتی و شۆفێران ل دۆر هنارتنا جۆرەکێ پەیامێن سەختە ب زمانێ عەرەبی، کو ب ناڤێ سزایێ سەرپێچییا هاتنوچوونێ داخوازا دانا پارەیی ژ وەلاتییان دکەت.

چارشەمبی، 2ـی ئیلۆنا 2026ێ، ل گۆرەیی راگەهاندنەکا رێڤەبەرییا گشتی یا هاتنوچوونا هەرێما کوردستانێ، د دەما بۆری دا پەیامەکا درێژ ب زمانێ عەرەبی بۆ ژمارەکا وەلاتییان هاتیە هنارتن کو تێدا ئاماژە ب تۆمارکرنا سەرپێچییا هاتنوچوونێ هاتیە کرن و داخواز دکەت د هەیاما 48 دەمژمێران دا سزا بهێتە دان، بەروڤاژی وێ چەندێ سزایێ گیرۆبوونێ دێ چیتە سەر و پشتی 30 رۆژان دۆسیە دێ هێتە دان بۆ دادگەهێ.

هاتنوچوونا هەرێمێ تەکەزی ل وێ چەندێ کریە کو ئەڤ جۆرێ پەیامان چو پەیوەندی ب رێڤەبەرییێن هاتنوچوونێ ل هەرێما کوردستانێ ڤە نینە و کارەکێ نەیاسایی و سەختەکارییە ب مەبەستا خاپاندنا وەلاتییان.

رێڤەبەرییا گشتی یا هاتنوچوونێ داخوازێ ژ شۆفێر و وەلاتییان دکەت کو هشیاربن و بەرسڤا ڤان جۆرە پەیامان نەدەن و ب چو رەنگان پارەیی بۆ وان ژمارە و ژێدەران نه‌فرێکەن.

هەڤدەم هاتنوچوونا هەرێمێ رۆهنکریە ژی کو شۆفێر دشێن بتنێ ب رێیا پلاتفۆرما فەرمی یا (KRD Pass) یان مالپەرێ فەرمی یێ رێڤەبەرییێن هاتنوچوونێ دەستێ خۆ بگەهیننە زانیارییێن دروست ل دۆر هەر سزایەکێ سەرپێچیێ ل سەر ترومبێلێن خۆ، ژبلی وان ژێدەرێن فەرمی باوەرییێ ب چو پەیامێن دی یێن ب ڤی رەنگی نەئینن.