گاڤ

ڤەکۆلینەکێ ل زانکۆیا زوریخ ل سویسرا پشکنینەکا نوی پێشئێخستیە بۆ دەستنیشانکرنا نیشانێن دلشکەستنێ و جوداکرنا وێ ژ جەلتەیا دلی.

د. فلۆریان وێنزل، سەرپەرشتێ ڤەکۆلینێ ل سەنتەرێ نۆشداری یێ دلی ل زانکۆیا زوریخ دبێژیت: "ڤەکۆلینا مە پشکنینەکا نوی ب ناڤێ BioTAK پێشئێخستیە، کو ب پیڤانا هندەک پێکهاتەیێن دناڤ خوینێ دا و وان پرۆتینێن پەیوەندی ب سترێسێڤە هەی کاردکەت (کو پتر د دەمێ دلشکەستنێ دا دەردکەڤن)".

د. فلۆریان وێنزلس گۆت ژی: "ڤەکۆلین ل سەر نێزیکی دو هزار کەسان هاتیە کرن و ٪90 ژ پشکنینان ئەنجامێن راست داینە".

کۆنیشانێن دلێ شکەستی دیاردەیەکا نۆشداری یا راستەقینەیە، ژبەر بلندبوونا ژنیشکەکێڤە یا هۆرمۆنێن فشارێ، پشکەک ژ ماسوولکەیێن دلی بۆ دەمەکێ لاواز دبن، نیشانێن وێ گەلەک دچنە سەر جەلتەیا دلی (ئێشانا سنگی و بێهنتەنگییێ)، لێ جوداهی ئەوە کو لویلەیێن خوینێ ناهێنە گرتن، بەلکو بتنێ ماسوولکە ژبەر خەمێ تووشی گرژییێ دبیت.

سازییا دلی ل ئەمریکا دبێژیت کو ژ مالێ هەتا پشکنینا هێلکارییا دلی پێدڤییە 10 خۆلەک بن، ژ مالێ هەتا کرنا قەستەرێ بۆ کەسێ تووشبوویێ جەلتەیا دلی پێدڤییە 90 خۆلەک بن، چونکی "خۆلەکەکا گیرۆبوونێ د ڤەژاندنا دلی دا، ٪10 ژ شانسێ ژیانێ کێم دکەت".

نیشانێن جەلتەیا دلی:

  - ئێشانا سنگی

  - ئێشانا مل و دەستێ چەپێ

  - دلرابوون و هلاڤێتن

  - خوهدان و ساربوونا پیستی

  - بێهنتەنگی

  - نەرێکوپێکییا لێدانێن دلی