گاڤ

ڤەکۆلینەک ل زانکۆیا نۆتینگهام ل بەریتانیا هاتییە کرن و دیارکریە، کێمبوون و زێدەبوونا چالاکییا دەمارەخانەیان ل دەڤەرا پێشییا مێشکی دشێت شیانا گونجاندنا رەفتاری تێک بدەت.

د. جاکۆ رێنسترۆم، یێ سەرپەرشتییا ڤەکۆلینێ کری دبێژیت: "ئەڤ دیتنە دیارکەن کو جۆرێن جودا-جودا یێن تێکچوونا کارێن پشکا پێشییا مێشکی دشیاندایە ببنە ئەگەرێ کێشەیێن جودا-جودا یێن هش و ژیرییێ، ل دویڤ داخوازییێن ئەرکی و قویناغا فێربوونێ".

بۆ ڤەکۆلەران دەرکەفت، چالاکییا گەلەک کێم و گەلەک مەزن یا پشکا پێشییا مێشکی، هەردو ژی دببنە ئەگەرێ تێکچوونەکا دیارکری د شیانا گوهۆرینا رەفتاری دا. ئەڤ چەندە ژی میکانیزمێن ڤەشارتی یێن مێشکی رۆهن دکەت ئەوێن ل پشت وان کێشەیان یێن کو د کەسێن تووشبوویێن نەخۆشیێن دەروونی یێن وەک شیزۆفرینیایێ دا دهێنە دیتن.

پلەیا پێشییێ مێشکی ئێکە ژ وان پشکێن کو پێگەهشتنا وێ درەنگ تەمام دبیت و گەلەک جاران هەتا ناڤەراستا بیستێن ژییێ مرۆڤی ژی گەشەکرنا وێ بەردەوام دبیت. هەر تێکچوونەک د کارکرنا ڤێ پشکێ دا دشیاندایە ببیتە ئەگەرێ دروستبوونا کێشەیان د بریاردان، رەفتارا جڤاکی و شیانا کۆنترۆلکرنا خۆ دا.