گاڤ

ڤەکۆلینەک ل ئەمریکا دیاردکەت، بکارئینانا موبایلێ ژ ئالییێ ژنێن دوگیانڤە چەندین مەترسییێن ساخلەمییێ پەیدا دکەت.

ڤەکۆلین ژ ئالییێ کۆلیژا ساخلەمییا گشتی یا زانکۆیا کۆلۆمبیا هاتییە کرن و تێدا دیاربوویە؛ بکارئینانەکا دەم-درێژ یا موبایلێ ژ ئالییێ ژنێن دوگیانڤە، دبیت پەیوەندی ب چەندین مەترسییێن ساخلەمییێڤە هەبیت بۆ سەر کۆرپەلەیی، ب تایبەتی ژی کێشەیێن دل و بۆرییێن خوینێ و کورتییا هەیاما دوگیانییێ.

زانکۆیا ئەمریکی ئاماژەیێ ب وێ چەندێ ددەت، گەلەک جاران بکارئینانا دەم-درێژ یا موبایلێ رامانا هاتنوچوونەکا کێمتر دهێت، کو ئەڤە ب خۆ ئەگەرەکێ مەترسیدارە بۆ کێمبوونا کێشا زارۆکی و بلندبوونا پەستانا خوینێ د دەما دوگیانییێ دا.

د. نۆرمان کلاینمان، سەرپەرشتێ ڤەکۆلینێ دبێژیت: "پێشکەفتنا بلەز یا تەکنەلۆژیایا موبایلێ و زێدەبوونا دەما بکارئینانا وێ، دلگرانی دەربارەیی کاریگەرییێن وێ یێن زیانبەخش د دەما دوگیانییێ دا زێدەکرینە''.

رێنمایی بۆ کێمکرنا مەترسییا بکارئینانا موبایلێ د دەما دوگیانییێ دا:

● بکارئینانا بلندگۆی (سپیکەر) یان هێدفۆنێن ب وایێرە د دەما ئاخڤتنێ دا.

● دویرئێخستنا موبایلێ ژ زکی.

● دانانا مەبایلێ ل سەر رەوشا فرۆکەیێ (airplane mode) دەما نەهێتە بکارئینان.