گاڤ

دادگەها بەرایێ یا رەسافە ل بەغدا، بریارا دەستەیا راگەهاندن و گەهاندنێ یا ئیراقی ب هەلوەشاندنا ئێک-ئالی یا گرێبەستا ئێکئالیکرنا دارایی ل گەل کۆمپانیا کۆرەک تیلیکۆم هەلوەشاند. کۆمپانییێ ژی د راگەهاندنەکێ دا ل ژێر ناڤ و نیشانێ "دادپەروەری سەرکەفت" راگەهاند کو بریار هاتییە دان دەملدەست کارکرن ب گرێبەستا وان دەستپێبکەت.

دوشەمبییێ، 28ـێ ئیلۆنا 2026ێ، کۆمپانییا کۆرەک تیلیکۆم راگەهاندنەک دەربارەیی کێشەیێن خۆ یێن یاسایی ل گەل دەستەیا راگەهاندن و گەهاندنێ یا ئیراقێ (CMC) بەلاڤکر و پشکداربوویی و رایا گشتی ژ نویترین بریارا دادگەها بەرایێ یا رەسافە ئاگەهدارکرن.

کۆرەک تیلیکۆم د بەیاننامەیا خۆ دا دبێژیت: پشتی وێ چەندێ کو ل 2-6-2026، دەستەیا راگەهاندن و گەهاندنێ یا ئیراقێ "ب شێوەیەکێ ئێک-ئالی بریارا هەلوەشاندنا گرێبەستا ئێکلاکرنا دارایی (التسوية المالية) یا دناڤبەرا واندا دایی،" کۆمپانییێ پەنا برە بەر دادگەهێ و ل سەر وێ بریارێ سکالا ل دژی دەستەیێ تۆمارکر.

کۆرەک تیلیکۆمێ راگەهاند، ئەڤرۆ 28ـێ ئیلۆنێ دادگەها بەرایێ یا رەسافە بریاردا ب "هەلوەشاندنا بریارا دەستەیا راگەهاندن و گەهاندنێ یا ئیراقێ و کارکرنا دەملدەست ب گرێبەستا ئێکئالیکرنا دارایی (التسوية المالية) دناڤبەرا هەردو ئالییان دا، ئەوا بەری نوکە ل 2025/9/23 هاتییە ئیمزاکرن".

کۆمپانییێ پێشوازییەکا تەمام ل بریارا دادگەها بەرایێ یا رەسافە کر و راگەهاند کو هەر ژ دەستپێکێ ل سەر بنەمایێ باوەریبوون ب سەروەرییا یاسایێ و رێزگرتن ل سازییێن دادوەری پەنا بریە بەر دادگەهێ، چونکی وێ ب ئێکانە "رێیا دروست بۆ ئێکئالیکرنا کێشەیان و پاراستنا مافان" دزانیت.

کۆرەک تێلیکۆم د بەیاننامەیا خۆ دا سوپاسییا بێ-دویماهی یا پشکدابوویێن خۆ کر بەرانبەر وێ خۆراگرییا دیارکری ل بەرانبەر وان هەو و فشارێن د دەمێ بۆری دا ژ ئالییێ دەستەیا راگەهاندن و گەهاندنێ ڤە تووشی کۆمپانیێ هاتینە کرن. هەڤدەم پشتراستی دا بکارهێنەرێن خۆ کو ب هەمی رێیان دێ بەرگرییێ ژ مافێن وان کەت و هەمی رێکارێن یاسایی بگریتەبەر داکو جارەکا دی تووشی ڤان جۆرە ئاستەنگ و کێشەیان نەبن.

ل دویماهییا بەیانێ ژی، کۆمپانییا کۆرەک تیلیکۆم هیڤیخوازە دەستەیا راگەهاندن و گەهاندنێ یا ئیراقێ لاپەرەکێ نوی و دویر ژ ناکۆکییان ڤەکەت و بێ-دروستکرنا ئاستەنگێن ل دویڤ-ئێک، پێکڤە کار بۆ ئارمانجێن هەڤپشک بکەن؛ ب وی رەنگی کو ئارمانج خزمەتکرنا پشکداربوویان و گەشەپێدانا کەرتێ پەیوەندییان بیت ل سەر بنەمایێ رێزگرتن ل دەقێن یاسایێ و بریارێن دادگەهێ، هەروەسا دویرکەفتن ژ رێکارێن ستەمکارانە کو نە د بەرژەوەندییا گشتی دایە.

دەستەیا گەهاندن یا ئیراقێ راگەهاندبوو کو ل دویماهییا ڤێ مەهێ دێ هەمی ئامیرەیێن کۆرەک تیلیکۆم ڤەمرینن و کارێ کۆمپانێ راگرن، داخواز ژ هەڤپشکێن کۆرەکێ کربوو سیمکارتێن خۆ بگوهۆرن. ل 18ـێ ڤێ مەهێ، ئانۆ جەوهەر، وەزیرێ ڤەگوهاستنێ گۆتبوو: "دەستەیا گەهاندن یا ئیراقێ نەشێت ل کوردستانێ کۆۆەکێ بڤەمرینیت، ئەم ژی ناخوازین بگەهیتە وێرێ، ئەڤە بابەتەکێ یاساییە و کۆمپانییەکا کوردستانییە و ب بریارا حکومەتا هەرێما کوردستانێ و وەزارەتا ڤەگوهاستن و گەهاندنێ کار دکەت، کەس ژی نەشێت کۆمپانییەکا کوردستانێ بڤەمرینیت بێ-زڤرین بۆ حکومەتا هەرێما کوردستانێ؛ مە سیستەمەکێ فیدرالی یێ هەیی نەک دیکتاتۆری".