گاڤ

ئەگەر تو هزر دکەی ئەو فنجانا قەهوێ یا تو پشتی نیڤرۆ ڤەدخۆیی بەری نڤستنێ ژ ناڤ دچیت، رەنگە پێدڤی بیت جارەکا دی دەمێ ڤەخوارنا دویماهی کۆپ، هزر تێدا بکەیەڤە.

ل گۆرەی پێداچوونە زانستی یا کو بۆ 24 ڤەکۆلینان هاتییە کرن، دیار دکەت: دەمێ دیارکری یێ ڤەخوارنا کافایینێ کاریگەرییا راستەوخۆ و بەرچاڤ ل سەر دەم و کوالیتییا نڤستنێ هەیە، ل گۆرەی ئەنجامان، دا کو نڤستنا تە تێک نەچیت، دڤێت دویماهیک کۆپێ قەهۆێ نێزیکی 8.8 دەمژمێران بەری نڤستنێ بهێتە ڤەخوارن، بۆ نموونە، ئەگەر تۆ دەمژمێر 10ی شەڤ بنڤی، دڤێت بەری دەمژمێر 1ی پشتی نیڤرۆ دەست ژ ڤەخوارنا قەهۆێ بەردەی.

کافایین رێگرییێ ل کارتێکرنا ماددێ (ئەدینۆسین) دکەت مرۆڤی د وەستینیت، ژبەر هندێ ئەگەر لەشێ تە ل حالەتێ بهێنڤەدانێ ژی بیت، کافایین مرۆڤی هشيار دهێلیت، ئەڤە ژی ئاریشەیە ژبەرکو کافایین زوی ژ لەشی دەرناکەڤیت و هندەک جاران مانا وێ پتر ژ نەهـ دەمژمێران ڤەدکێشیت.

ڤەکۆلین دیار دکەن، ڤەخوارنا کافایینێ ل نێزیکی دەمێ نڤستنێ، تێکرایا نڤستنا شەڤێ ب 45 خۆلەکان کێم دکەت، دەمێ پێدڤی بۆ چوونا ناڤ خەوێ ب 9 خۆلەکان زێدە دکەت و 12 خۆلەکان ژی بێخەوییێ ل شەڤێ دروست دکەت.

د ڤەکۆلینان دا هاتییە ژی: ئەڤ بابەتە بۆ راهێنەر و وەرزشڤانان گرنگترە، ئەو تەمامکەرێن خوارکی یێن وەرزشی ژبەر کو رێژەیەکا بلند یا کافایینێ تێدایە، دڤێت ب کێمی 13 دەمژمێران بەری خەوێ بهێنە خوارن، ژ بەر هندێ پرسیارا گرنگ نە ئەوە تۆ چەند کۆپان دڤەخۆیی، بەلكو ئەوە دویماهیک کۆپ تە کەنگی ڤەخوارییە؟